Bıyl L.N. Gýmılev atyndaǵy Eýrazııa ulttyq ýnıversıtetiniń Qytaıdaǵy fılıaly ashylady. Onda hımııa jáne bıologııa salasyndaǵy mamandar daıarlanady. Osylaısha, aspan asty eliniń stýdentterine óz eliniń aýmaǵynan shyqpaı, EUÝ dıplomyn alýǵa múmkindik beriledi, dep jazady Egemen.kz.
Tıisti kelisimge EUÝ rektory Erlan Sydyqov pen Nannınsk pedagogıkalyq ýnıversıtetiniń prezıdenti Lı Chýankı qol qoıdy. Taraptar Qytaıda Eýrazııa ǵylymı-tehnologııalyq ınstıtýtyn birlesip qurýdy kózdep otyr. Alǵashqy qabyldaý jáne stýdentterdi bakalavrıat deńgeıinde oqytý aspan asty elinde bıyldan bastap júzege asady. Ýnıversıtet qurý týraly bastamany qytaılyq tarap kóterdi.
«Qytaı stýdentteri úshin óz elderiniń aýmaǵynda EUÝ dıplomyn alýǵa múmkindik beriledi. Bizdiń JOO-nyń professorlyq-oqytýshylyq quramy Nannın qalasyna baryp, oqý prosesin júrgizedi. Biz yntymaqtastyqty damytýǵa jáne óz tájirıbemizdi QHR-daǵy áriptesterimizben bólisýge nıettimiz. EUÝ fılıalynyń Nannınsk pedagogıkalyq ýnıversıtetimen birlesken ınstıtýttyń ashylýy - bizdiń joǵary oqý oryndarymyz úshin aýqymdy ári mańyzdy joba», dedi EUÝ rektory Erlan Sydyqov.
Aıta keteıik, Qytaıda birlesken ınstıtýtty ashýǵa daıyndyq jumystary 2 jylǵa sozyldy. Bıologııa ǵylymdary, hımııa jáne qoldanbaly hımııa salalarynda jahandyq bilim berý baǵdarlamalary ázirlendi.
Nannınsk pedagogıkalyq ýnıversıtetiniń prezıdenti Lı Chýankı atap ótkendeı, eki ýnıversıtet arasyndaǵy yntymaqtastyq pen birlesken bilim berý mekemelerin ilgeriletý álemdik damý úrdisterine beıimdele alatyn talantty mamandardy daıarlaýǵa yqpal etedi.
«Bizdiń oqý oryndarymyzdyń tyǵyz yntymaqtastyq ornatýda artyqshylyqtary men negizderi bar. «Qytaı-halyqaralyq yntymaqtastyǵynyń aqparattyq platformasy» arqyly Nannın pedagogıkalyq ýnıversıteti men Eýrazııa ulttyq ýnıversıteti jan-jaqty yntymaqtastyq ornatyp, akademııalyq utqyrlyq pen ǵylymı baılanysty jalǵastyrady jáne tereńdete túsedi dep senemin», dedi ol.
Atap ótken jón, 2022 jyly EUÝ fılıaly Qyrǵyzstanda ashylǵan edi. Ulttyq ýnıversıtet kelesi jyly shetelde taǵy bir ókildigin ashýdy josparlap otyr.