Almatyda Ortalyq Azııa, Kavkaz jáne Azııa-Tynyq muhıty aımaqtarynyń 12 eliniń sıfrly úkimetterin damytýǵa arnalǵan joba iske qosyldy. Bul bastamany Koreıa Respýblıkasy úkimeti qarjylandyrady, dep habarlaıdy Egemen.kz.
Jobanyń eń alǵashqy jıyny – «Sıfrly memlekettik basqarý men sıfrly transformasııa» aımaqaralyq konferensııasyna álemniń 13 elinen 50-den astam sarapshy, memlekettik organ ókilderi qatysyp jatyr.
Astana memleketti qyzmet haby, Koreıa Respýblıkasy Ishki ister jáne qaýipsizdik mınıstrligi (MOIS) jáne Aqparattyq qoǵam máseleleri boıynsha Ulttyq agenttigi (NIA), Qazaqstandaǵy BUU Damý baǵdarlamasy ótkizetin konferensııa barysynda qatysýshylar memlekettik basqarýdaǵy ınnovasııalar men sıfrlandyrý salasyndaǵy úzdik halyqaralyq tájirıbeler men keıstermen tanysady.
Konferensııany ashqan BUU Damý Baǵdarlamasy Qazaqstandaǵy Turaqty ókili Katarjına Vavernıa búgingi tańda sıfrlyq tehnologııalar damý quraldary kontekstin, sondaı-aq olardyń ózderin de túbegeıli ózgertip jatqanyn aıtty.
«Osy jańa bastama arqyly biz Koreıanyń sátti tájirıbesin paıdalana otyryp, sıfrlyq transformasııany ilgeriletýdi maqsat etip otyrǵanymyzdy maqtanyshpen aıtamyn. Bilimmen, ozyq tájirıbelermen jáne zertteýlermen almasý, semınarlar men oqý saparlary arqyly biz qatysýshy elderdiń memlekettik sheneýnikterine basqarý júıeleriniń sıfrlyq transformasııasyn baǵdarlaýǵa jáne azamattarǵa qyzmetterdi tıimdi jetkizýge múmkindik beremiz», dep málimdedi BUUDB-nyń Qazaqstandaǵy turaqty ókili Katarjına Vavernıa.
Koreıa Respýblıkasy Ishki ister jáne qaýipsizdik mınıstrliginiń (MOIS) Sıfrly úkimet pen ınnovasııalar Ofısynyń Sıfrly qaýipsizdik saıasaty bólimi Dırektory Von-Gab DJO úsh jyl ishinde jeti el arasynda aıtarlyqtaı nátıjelerge qol jetkizip, qazir 12 elge deıin keńeıgen aımaqtyq joba aýqymyndaǵy yntymaqtastyqtyń mańyzdylyǵyn basa aıtty.
Joba qatysýshylarǵa sıfrly transformasııada aıtarlyqtaı jetistikterge jetýge kómektesedi. Von-Gab Djo Koreıa úkimetiniń azamattarǵa sıfrly platforma jáne tıimdi basqarý arqyly sapaly qyzmet kórsetýge degen umtylysyn atap ótip,Koreıanyń sıfrlyq úkimet salasyndaǵy tujyrymdary jáne jetistikterimen bólisýge daıyn ekenin bildirdi.
Astana memlekettik qyzmet haby basqarýshy komıtet tóraǵasy Álıhan Báımenov «qazirgi tańda memlekettik basqarýdyń mańyzdy quraldarynynyń biri -sıfrlandyrý» dep atap ótti.
«Sıfrly memlekettik basqarý ózara baılanysty álemde qajetti ákimshilik prosesterdi ońtaılandyrýǵa, sheshimder qabyldaýdy jaqsartýǵa jáne ózekti máselelerdi sheshýde ınnovasııalardy yntalandyrýǵa múmkindik beredi. Bul memlekettik qyzmet kórsetýde tıimdilik pen ashyqtyqty arttyrýǵa, azamattardyń aralasýy men senim deńgeıin arttyrýǵa yqpal etedi», dedi ol.
Álıhan Báımenov Koreıa Respýblıkasy Úkimetimen birlesken jobanyń mańyzdylyǵyn atap ótti. Bul jobany qatysýshy elder joǵary baǵalap, oǵan qatysýshylar aýqymy odan saıyn keńeıip, jańa jobaǵa negiz bolǵan.
EYDU sıfrly úkimet ındeksi reıtınginde álemdik kóshbasshy sanalatyn Koreıa Respýblıkasy sarapshylary strategııalar men ınnovasııalardy, sondaı-aq zańnamalyq aspektilerdi qosa alǵanda, sıfrly transformasııanyń koreılik jolymen tanystyrdy.
Kavkaz (Grýzııa, Armenııa, Ázerbaıjan) jáne Ortalyq Azııa (Qazaqstan, Qyrǵyzstan, Tájikstan) elderiniń memlekettik organ ókilderi qatysýshylardy óz úkimetteriniń sıfrly platformalarynyń jumys prınsıpterimen tanystyrdy.
Konferensııanyń ekinshi kúni, 30 mamyrda kópshilik nazaryn О́zbekstan jáne Azııa-Tynyq muhıty elderinde (Fılıppın, Laos, Kambodja, Mońǵolııa, Bangladesh) qoldanylatyn tájirıbe aýdardy.
Konferensııa aıasynda qatysýshylar pikirler men ıdeıalar almasyp, qatysýshylar sıfrly memlekettik basqarýdy tıimdi damytý boıynsha jetekshi sarapshylar pikirin tyńdap, yntymaqtastyqtyń basym baǵyttary men birlesken joba aıasyndaǵy is-sharalardy belgileıdi.