Qostanaıda tirek-qımyl júıesi buzylǵan jáne nevrologııalyq aýrýy bar balalardy erte jastan beıimdeý ortalyǵy ashyldy. Oblystyq balalar aýrýhanasynyń ǵımaratyna ornalasqan ortalyq jylyna 600-deı balany qabyldap, ómirge beıimdelýine kómek kórsete alady, dep jazady Egemen.kz.
Bul – elimizde «Samruk-Kazyna Trust» qory men «Qazaqstan halqyna» qorynyń qoldaýymen ashylyp otyrǵan on jetinshi memlekettik ortalyq. Emdeý-ońaltý mekemesi kemtarlyǵy bar balalardyń emine qajet beıimdeý jáne dıagnostıkalyq medısınalyq qurylǵylar, arnaıy tehnıkalyq quraldar, trenajerler men baǵdarlamaly qurylǵy keshenderimen jabdyqtalǵan. Sondaı-aq ortalyqta vertıkalızator, ımpressondy vanna, sensorlyq, shýngıt jáne tuz bólmesi, EEG, aýdıometrııalyq modýl, ózge de zamanaýı medısınalyq qurylǵylar bar. Erte beıimdeý ortalyǵy neıro-ortopedııalyq naýqasqa shaldyqqan jáne osy aýrýdyń belgileri bar úsh jasqa deıingi sábılerge kómek kórsetýdi kózdeıdi.
Ortalyq oblystyq balalar aýrýhanasynyń beıimdeý bóliminiń quramynda jumys isteıtin bolady. «Qamqorlyq qorynyń» balalarǵa arnalǵan osyndaı emdeý mekemesin ashý týraly usynysynan keıin, oblys ákimdigi aýdany 500 sharshy metr bolatyn ǵımaratty jónge keltirip, daıyndyq jumystaryn júrgizý úshin 55 mln teńge qarjy bólgen. Buǵan «Qamqorlyq qory» da 124,6 mln teńge bólip otyr. Sonymen qatar ákimdik ortalyqqa jylyna 256 mln teńge kóleminde qarjy bólip otyrady.
Beıimdeý bóliminiń meńgerýshisi Gúlbaram Nurhanovanyń aıtýynsha, ortalyqqa nevrolog, reabılıtolog dárigerler, EDSh nusqaýshylary, logoped, defektolog, psıholog mamandar jumysqa alynǵan. Mamandar biliktilikti arttyrýdyń birneshe kezeńinen ótedi.
«Árıne, áli de mamandar kerek bolady. Munda balalar 21 kún boıy beıimdeý kýrsynan ótedi. Bizde 60 oryn bar. Emdelýshiler pedkorreksııa, ıppotrenajer, balanyń tabany men ókshesin, júrisin túzeıtin korvıt apparaty bar. Beıimdeý bólimi 10 jyldan beri jumys istep jatyr. Endi búgingi ortalyqtyń ashylýy – balalardy erte jastan qoldaý baǵytyndaǵy múmkindigimizdi keńeıte túsedi», deıdi bólim meńgerýshisi.
Ortalyqtyń ashylý saltanatyna oblys ákiminiń orynbasary Rınat Muhametqalı, densaýlyq saqtaý salasynyń mamandary, «Samruk-Kazyna Trust», «Qamqorlyq qorynyń» ókilderi qatysty. Jalpy, búginde óńirde shamamen 28 myńdaı múmkindigi shekteýli adam bar. Onyń 300-den astamy – úsh jasqa tolmaǵan balalar.
«Atalǵan ortalyq erekshe qajettiligi bar balalardyń ómir súrý sapasyn jaqsarta túsedi. Ákimdik ortalyqqa árdaıym qoldaý kórsetip otyratyn bolady. Ortalyqty ustap turýǵa jylyna 250 mln teńge bólip otyratyn bolamyz», dedi Rınat Muhametqalı.
«Samruk-Kazyna Trust» qorynyń bas dırektory Álfııa Ádıevanyń aıtýynsha, jańa ortalyq qozǵalys daǵdylaryn damytýdyń zamanaýı tehnologııalarymen, arnaıy tehnıkalyq quraldarmen, trenajerlarmen, apparattyq-baǵdarlamalyq keshendermen jabdyqtalǵan.
«Erte qolǵa alý ortalyǵy balalarǵa áleýmettenýge, qajetti ońaltý emin alýǵa, ómirlik mańyzdy daǵdylardy meńgerýge jáne bilikti kómek alýǵa múmkindik beredi. Ortalyqqa 46 bala kelip, ońaltý kýrsynan ótip jatyr. Erte qolǵa alý ortalyqtaryn qurý jobasy erekshe balalardyń óz turǵylastarynan damý alshaqtyǵyn azaıtýǵa yqpal etedi jáne olardyń balabaqshada, mektepte, jalpy ómirge beıimdelý múmkindigin arttyrady. Týylǵannan úsh jasqa deıingi kezeń balanyń damýyndaǵy eń mańyzdy kezeńderdiń biri. Jalpy, ınklıýzııany damytý aıasynda «Samuryq-Qazyna» qorynyń qoldaýymen, onyń ishinde seriktestermen birlese otyryp, túrli baǵyttaǵy 38 ońaltý ortalyǵy ashyldy. Sondaı-aq seriktestermen birlesip, jańa ońaltý ortalyqtaryn jáne aýtızmge shaldyqqan balalarǵa arnalǵan ortalyqtardy iske qosý máselesin pysyqtap jatyrmyz», degen Álfııa Ádıeva jańa densaýlyq saqtaý uıymynyń mańyzdylyǵyn jetkizdi.
Jalpy, «Qazaqstan halqyna» qory densaýlyq saqtaý jáne áleýmettik kómek salasyndaǵy kóptegen jobalarǵa muryndyq bolyp otyrǵanyn aıta ketý kerek. Qordyń basym baǵyttarynyń biri – balalarǵa ońaltý kómegin kórsetýge baǵyttalǵan ınfraqurylymdy damytý.
«Sońǵy jyldary el kóleminde qanshama aýtızmge shaldyqqan balalarǵa arnalǵan ortalyqtar men balalarǵa arnalǵan ońaltý ortalyqtaryn uıymdastyrý jobalary júzege asyryldy. Máselen, Qostanaıdaǵy jańa ortalyqqa jyl saıyn 600-den astam bala kelip, ýaqtyly kómek alyp, dıagnostıkadan óte alady. Bul olardyń ómir sapasyn jaqsartady. Joba aıasynda jańa jabdyqtar satyp alyndy, mamandar oqý kýrstaryn támamdady», deıdi «Qazaqstan halqyna» QQ Densaýlyq saqtaý salasyndaǵy baǵdarlamalar men jobalardy basqarý ortalyǵynyń basshysy Gúlzııa Bıdatova.
«Qamqorlyq qory» korporatıvtik qorynyń dırektory Araılym Erkinovanyń aıtýynsha, Qostanaıda ashylǵan jańa ortalyq óńirdegi erekshe balalardy sapaly jáne jan-jaqty ońaltýǵa, olardyń meılinshe damýyna jáne qoǵamnan óz ornyn tabýyna yqpal etedi. Búgingi tańda elimizde QR Úkimeti, óńirlerdegi ákimdikter, «Qazaqstan halqyna» qory, «Samuryq-Qazyna» UÁQ tárizdi joba seriktesteriniń birlesken kúshimen 17 memlekettik erte qolǵa alý ortalyǵy ashylǵan. Bıyl taǵy 3 ortalyq ashylmaq. Erekshe balalarǵa arnalǵan erekshe ortalyqtar jyl saıyn shamamen 12000 bala qabyldaıdy.