Esirtki qylmysyn baqylaıtyn alǵashqy digital-karta iske qosyldy. Mádenıet jáne aqparat mınıstrliginiń qoldaýymen daryndy jastarmen birge ázirlengen joba ázirge qanatqaqty rejimde elorda aýmaǵynda testilenedi. Bul jobaǵa kez kelgen belsendi azamat qatysa alady.
Búginde esirtkimen kúres memleket ustanǵan baǵyttyń bir tarmaǵyna telinse de, esti adamdy esirtip-elirtetin dúnıege degen qumarlyq tyıylar emes. Bul áldekimder úshin bir sáttik lázzattyń kózi bolsa, endi bireýler úshin kóleńkeli bızneske aınalyp ketken. Keıingi bes jylda esirtki qylmystary boıynsha 19 myńǵa jýyq adam jaýapqa tartylǵan. Osy oraıda byltyr «Astana Hub» jáne «Jastar rýhy» jastar qanaty «Amanat Tech» hakatonyn uıymdastyrdy. Onda elimizdegi ózekti problemalardy kreatıvti jolmen sheshýge umtylǵan daryndy jastar óz jobalaryn usyndy. Arasynan Nazarbaev zııatkerlik mektebi oqýshylarynan quralǵan «Shalqyma» komandasy júldeli orynǵa ıe boldy. Olar naqty ýaqyttaǵy esirtki qylmysyn baqylaý kartasy ıdeıasymen top jardy. Bastamany «Esbol qory» qoldap, sandyq karta iske qosyldy.
– Internet betterin ashsaq, esirtki satýshylar ustalǵany týraly aqparat qaptap júr. Qala berdi áleýmettik jelilerde paraqtasaq, esirtki qoıyp ketýshilerdiń beınejazbasy da tolyp tur. Sondyqtan esirtkimen baılanysty qylmys ataýlynyń jolyn kesýmen qatar, onyń aldyn alý máselesi basty nazarda. Biz Memleket basshysy Qasym-Jomart Toqaevtyń «Nashaqorlyq pen esirtki qylmysymen kúres jalpyulttyq sıpat alý kerek» degen qaǵıdatyna saı jumys istep jatyrmyz. Bul kartanyń iske qosylýy – barlyq esirtki saýdagerlerine úreı týdyratynyna senimdimin. О́ıtkeni esbol.kz saıtynda karta naqty ýaqyt rejiminde jańartylyp otyrady. Kez kelgen belsendi azamat esirtki qylmysynyń belgilerin baıqasa, birden júkteı alady. Karta Astana qalasynda sátti júzege asyp, naqty nátıjeler kórsetse, respýblıkanyń ár óńirinde engizilmekshi, – dedi «Esbol qory»-nyń tóraǵasy Jandos Aqtaev.