Tańǵajaıyp tas músin oblystyq tarıhı-ólketaný murajaıyna 1986 jyly tapsyrylǵan. Mýzeı mamandary muny Tobyl oıshyly nemese antropomorfty tas músin dep ataıdy.
Eki qolyn qýsyryp sonaý kókjıekke kóz tikken qalpy búkireıip otyrǵan jumbaq músin Qostanaı qalasynyń irgesindegi qazirgi Amangeldi eldi mekeniniń mańynan tabylǵan. Músin aqshyl sary tústi iri túıirshikti qumtastan qashalǵan.
Músinniń bıiktigi – 19-aq santımetr. Ǵalymdardyń boljamynsha, qolóner týyndysy eneolıt dáýirinde jasalǵan. Bul – shamamen bizdiń zamanymyzǵa deıingi úshinshi myńjyldyqtyń sońy, ekinshi myńjyldyqtyń bas kezi.
«Betine bir syzat túspegen. Jaǵy jaılap keýdeniń joǵary tusyna ulasady. Tek ıegi ǵana alǵa shyǵyp tur. Aýzy oıyq syzyqpen kórsetilgen. Denesiniń aldyńǵy bóligi óńdelmegen, eshqandaı oıyǵy joq. Jumyr kelgen arqasy eptep óńdelgen. Qazir bul antropomorfty músin Tobyl oıshyly dep atalyp júr. Qalaı bolǵanda da, Tobyl ózeniniń jaǵasynan tabylǵan tas jádigerge til bitse, kóne órkenıettiń talaı jumbaǵyn syr ǵyp aqtaratyny anyq», deıdi mýzeı mamandary.
Qostanaı oblysy