Amangeldi aýdanynda 48 úı salynady

Sý tasqyny kezinde atalǵan aýdanǵa qarasty 13 eldi mekende 162 úı sý astynda qalǵan. Arnaıy komıssııa júrgizgen tehnıkalyq baqylaý qorytyndysy 98 turǵyn úıdi qalpyna keltirýge bolatynyn, 44 úıdiń apatty jaǵdaıdyń 5-shi, 54 úıdiń 4-sanatyna jatatynyn kórsetti. Qalpyna keltirýge bolatyn 64 úı bar.

«Turǵyn úı ıeleriniń bárimen kezdesý ótkizip, jergilikti atqarýshy bılik, merdigerler, halyq bolyp birlese otyryp, ár úıge jeke-jeke toqtalyp, qalpyna keltirý joldaryn anyqtadyq, qalaı etsek durys bolady, sonyń bárin ábden pisi­rip, pysyqtap aldyq. Jalpy, aýdan kóle­minde 48 jańa turǵyn úı salý qajet. Qazir 27 úıdiń irgesi qalandy. Qurylys jumys­tary qyzý júrip jatyr. Amandyq bolsa, kóp keshikpeı Amangeldi aýlynda 18 úı, Aǵash­tykólde 3, Qarasý aýlynda 2, Esirde 2, Baı­ǵabylda 1 úı boı kóteredi», deıdi Aman­geldi aýdanynyń ákimi Talǵat Kárbozov.

Amangeldidegi turǵyn úılerdi Áýlıekól aýdany men Rýdnyı qalasynan kelgen birneshe qurylys brıgadasy turǵyzyp jatyr. Qurylys materıaldaryn jetkizýdi joǵaryda atalǵan eki aýdannyń ákimdigi uıymdastyrady. Mysaly, «Sara KZ» qurylys kompanııasy munda árqaısysynyń kólemi 80 sharshy metr bolatyn úsh bólmeli 6 úı salýda.

«Munda kelgeli 3 úıdiń irgesin kóterip qoıdyq. Qyrkúıekke deıin ózimizge júktelgen 6 úıdi túgel salyp bitip, turǵyndarǵa tapsyryp berýimiz kerek. Qurylys materıaldary ýaqtyly kelip jatyr. Jatyn ornymyz ben tamaǵymyzdy jergilikti ákimdik jaqsy rettep berip otyr. Jumys qarqyny jaqsy. Belgilengen meje – 1 qyrkúıekke deıin jumysymyzdy aıaqtaımyz dep oılaımyn. Úsh brıgadaǵa bólingen jıyrma shaqty qurylysshy jumys istep jatyr. Biz salyp jatqan úıler – tıptik úlgidegi óte sapaly úıler. Dárethanasy, jyly sý, aýyzsýy ishinde bolady. Avtonomdy jylý júıesi bar», deıdi merdiger kompanııanyń basshysy Shernııaz Seıitqalıev.

Taıaýda Amangeldi aýdanyna oblys ákimi de arnaıy jumys sapary­men baryp, mundaǵy qurylys jumystary­nyń barysyn kórip, merdiger kompanııa basshylarymen kezdeskende, «Eń bastysy, qurylys sapasyna mán berińizder. Qurylysty merziminde aıaqtap, keshiktirmeı turǵyndarǵa ótkizip berińizder. Qysqa erterek qamdanyp, qora-qopsysyn ázirleı bersin» dep tapsyrǵan. Odan keıin ákim tasqyn saldarynan baspanasyz qalǵan turǵyndarǵa satyp alynǵan birneshe úıge kirip shyqty. Úı ıeleriniń qal-jaǵdaıyn surap, jańa baspanasynyń jaıyn tekserdi.

«Bizge aınala alasapyran bolyp jatqan qıyn sátte qajetti kómektiń bári der kezinde kórsetildi. Aqıqatyn aıtý kerek, bárimiz qysyltaıańda qalǵanda memleket eshqaısymyzdy eshteńege muqtaj qylǵan joq. Keregimizdi ýaqtyly taýyp berip, jaǵdaıymyzdy jasap berip, qamqorlyǵyn aıamady. Sondyqtan bul eldiń basshylarǵa rahmetten basqa aıtary joq. Sýǵa ketken burynǵy úıimiz eskirip qalyp edi, odan keıin memleket satyp alyp bergen jańa úıimiz kóńilimizden shyqty», deıdi Amangeldi aýylynyń turǵyny Ersin Nurfaıylov.

Aýdan ákimdiginiń málimetinshe, Amangeldi óńiriniń turǵyndary Arqa­lyq qalasynda salynyp jatqan kópqabatty jańa úıden 16 páter, dál osy qaladan ekinshi naryqtaǵy turǵyn úılerden 14 páter satyp alynady. Buǵan qosa Amangeldi aýlynan «Kómek KST» qaıyrymdylyq qory esebinen 13 turǵyn úı satyp alý josparlanyp otyr. «Búginge deıin Amangeldi aýdanynan 5 úı satyp alyndy, qazir Amangeldiden taǵy 2, Arqalyq qalasynan ekinshi naryqtaǵy 4 páter, 2 jeke úı satyp alý jóninde kelisimshart jasasyp jatyrmyz», deıdi aýdan ákiminiń orynbasary Súndet Ǵanıev.

Joıqyn sý tasqyny aýdannyń kólik jáne ınjenerlik ınfraqurylymyna da edáýir zııan keltirip, talaı aýyldy jolsyz aralda qaldyrdy. Búginge deıin bul eldi mekenderdiń bárine jol qatynasy bar. Sý shaıyp ketken Baıǵabyl, Tasty aýyldaryna kire­beristegi eki jol «Alıýmınstroı» JShS qalpyna keltirip jatyr. Stepnıak aýlyna kireberistegi jergilikti mańyzy bar avtomobıl jolyna ortasha jóndeý jumystaryn júrgizýge tehnıkalyq qujattamalary ázir tur. Sondaı-aq «KomJolStroy» JShS «Úrpek-Qabyrǵa» avtokólik jolyn qalpyna keltirip ­jatyr.

«Sonymen qatar «Alıýmınstroı» seriktestigi taıaýda ǵana «Amangeldi – Úrpek – Rahmet – Álibı» baǵytyndaǵy jergilikti mańyzy bar avtomobıl jolyn ýaqytsha qalpyna keltirý ju­mysyn aıaqtady. Sý tasqyny saldarynan Qabyrǵa aýlyndaǵy «Bıjan» bógeti de zardap shekken edi. Jergilikti atqarýshy organnyń tótenshe rezervi esebinen bul bóget te ýaqytsha qalpyna keltirildi. Aldaǵy ýaqytta tolyq qalpyna keltirý jumystaryn atqarýǵa jobalyq-smetalyq qujattamalar ázirleý josparlanyp otyr», deıdi ­aýdan ákimi.

Tasqyn sý jolynda kezdesken elektr baǵandaryn qulatyp, Amangeldi aýdanyna qarasty 20 eldi meken jaryqsyz qalǵan. Búginge deıin 16 eldi mekenge jaryq berilip, Qabyrǵa, Aqkisi, Qoǵalykól, Ábý Syzdyqov syndy 4 aýyldyń elektr jelisin jóndeý jumysy júrip jatyr.

Qysyltaıań sátte aýdanǵa jan-jaqtan gýmanıtarlyq kómek jiberip, eldik pen birliktiń, baýyrmaldyq pen shynaıy janashyrlyqtyń úlgisin kórsete bilgen aǵaıyn jóninde aıtpaı ketýge bolmas. Talǵat Karbozovtyń aıtýynsha, aýdan turǵyndary 28 naýryzdan bastap gýmanıtarlyq kómek ala bastaǵan.

«Birinshi bolyp kómek qolyn sozǵan Qostanaı oblysy QHA ókilderi boldy. Elimizdiń alys-jaqyn óńirlerin, iri qalalaryn aıtpaǵanda, О́zbekstan, Qyrǵyzstan, Tájikstan, Túrkııa syndy elderden gýmanıtarlyq kómek keldi. Mamyrdyń otyzyna deıin bas-aıaǵy 315 tonnadan astam ınertti zat, azyq-túlik, kıim-keshek keldi. Sý tasqynynan zardap shekken úılerge 195 generator, 56 kıiz úı, qaıyq, jylytqysh peshter, neshe túrli turmystyq zattar, dári-dármekter berildi. Gýmanıtarlyq shtab ózimizden artylǵanyn kórshiles Jangeldın aýdanynyń 7 aýlyna jiberip, kómektesip otyrdy. Qazirdiń ózinde zardap shekken otbasylarǵa satyp alynǵan páterlerge qajetti jıhazdar alyp berip jatyrmyz», deıdi aýdan ákimi.

Amangeldidegi arnaıy komıssııa búginde 91 azamattyń múlik shyǵynyn ótep berýdi josparlap otyr. Aýdanda tabıǵı apattan zardap shekken azamattardy áleýmettik qorǵaý sharalary aıasynda 685 otbasyna 100 AEK kólemindegi birrettik járdemaqy tólengen. Sharýa qojalyqtary men aýyl turǵyndarynyń mal shyǵynyn óteý barysy da josparǵa sáıkes oıdaǵydaı atqarylyp jatyr.

Qostanaı oblysy