Túzeý mekemesindegi teatr qoıylymy

Qoıylymdaǵy oqıǵa bir shańyraqtyń astynda ósip, erjetken aǵa­ıyn­dy jigitterdiń arasyndaǵy áńgime arqyly órbıdi. Bir-birin ishteı jaqsy kóretin úsh aǵaıyn­dy ákeleri qaıtys bolǵan soń, baıaǵy uıyǵan tatýlyq-birlikten, baýyrmaldyqtan aıy­rylyp, árqaısysy ár soqpaqqa túsedi. Aǵaıyndylar degen aty ǵana bolmasa, burynǵydaı jaqyn qarym-qatynas joq. Ortanshysy aǵasyna renjýli. Aǵasy «maǵan aqyl aıtpa, óz ornyńdy bil» dep inisine renjýli. Únemi sózge kelip qala beretin eki aǵasynyń berekesiz áńgimesinen úıdiń kenje uly Syrym da ábden qajyǵan. Sondyqtan stýdent Syrym qara shańyraqtan aýlaqqa ketip, alys shetelde oqyǵysy keledi.

Aınalasy bir saǵattyń ishinde búgingi qoǵamda, keıbir otbasynda kezdesip qalyp jatatyn keleńsiz kórinisterdi sahnaǵa alyp shyǵyp, áleýmettik salmaǵy batpan qadaý-qadaý máselelerdi kótere otyryp, kórermenge keıde aǵaıyn arasyndaǵy úlken ókpe-renishtiń, arazdasý men sýysyp ketýdiń artynda túkke turǵysyz dúnıeler turatynyn uqtyra bilgen teatr qudiretin moıyndamasqa shara joq. Mekeme ǵımaratyna aıdaý­men kirgen soń, áý bas­ta sahnaǵa mysqyldaı qarap, jaı ýaqyt ótkizý úshin kelgenin emeýrinmen tanytqandaı kóringen keıbir sottalýshylardyń qoıy­lym­nyń orta tusynda múlde ózgerip, tereń tolqynys, úlken tebirenis ústinde otyrǵanyn baıqaǵanymyzda-aq osyǵan kóz jetkizgendeı boldyq.

«Sóz joq, spektakldegi kóri­nis­terdiń bári shynaıy ómirden alynǵan. Akterler de shynaıy oınady. Kásibı ónerpazdar ekeni kórinip tur. Qoıylymǵa kelsek, óte unady. Anamyzǵa degen saǵynyshymyzdy údetti. Bizge osyndaı jaqsy rýhanı demalys syılaǵan departament basshylaryna alǵysymyz sheksiz. О́zimiz de aǵaıyn-týys, bala-shaǵamyzdy saǵynyp júrmiz. Spektakldegi úsh aǵaıyndynyń úlkeni – óte aqkóńil, adamǵa sengish, kópshil. Biraq týǵan baýyrlarymen emes, dostarymen jıi aralasady. Sol minezinen ár nársege ury­nyp, joly bolyńqyramaı júre­tin adam. Ekinshisi – alaıaqtaý, je­ńil­diń astymen, aýyrdyń ústimen júr­gendi unatady. Aǵasyn aǵa dep qurmettemeıdi, únemi keketip, aqyl aıtyp júredi. Al otba­sy­nyń kenjesi Syrym óz aǵala­ryn­daı emes, alǵyr, bilimdi, adal. Aqyry aǵaıyndylardyń ózara til tabysyp, tatýlasýyna osy Syrym túrtki bolady. Mun­da ózimiz sııaqty aǵaıynnyń qadi­rine jetpeı, úlkenniń aqylyn tyńdamaǵandyqtan, jaqynnyń janashyrlyǵyn sezinbegendikten adasyp, jazym basqandar otyr. Qoıylym qaı-qaısymyzǵa da oı saldy. Erkin kúnderimiz, jibergen qatelikterimiz kóz aldymyzǵa kel­gendeı boldy. О́zim de jaza merzimin ótep shyqqan soń, jańa ómir bastasam, aǵaıyn-týystyń qata­ryna qosylyp, jumys iste­­­sem, bala-shaǵamdy durys tár­bıe­lesem dep kúnine myń oılanyp, júz tolǵanamyn. Amandyq bolsa, ol kún­ge de jetermin», deı­di túzeý meke­me­sinde jazasyn ótep jatqan Azamat Muratov.

Spektaldiń qoıýshy rejıs­seri – Tal­ǵat Tájikovtiń aıtýynsha,­ spek­takldiń sońynda osyndaı áleý­mettik máselelerdiń týyn­da­ýyna kim kináli degen saýal qoıylady.

«Keıbir jastardyń urlyqqa baratynyna, bir otbasy múshe­leriniń, jaqyn aǵaıynnyń arasyndaǵy arazdyqqa, túsin­beý­shilikke kim kináli? Qoıylym – janry boıynsha otbasylyq drama. Qoıylymda úlkenge degen qurmet, kishige degen izet, otbasynda árkimniń óz orny bar, sony bilý, joǵaltpaý, otbasylyq qundylyqtardy saqtaý sııaqty máseleler bar. Biz bul spektakldi oblystyq qylmystyq atqarý júıesi departamentiniń usyny­symen qoıdyq. Ásirese osynda jatqan azamattarǵa oı salatyn dúnıe», deıdi rejısser.

Oblystyq QAJD baspasóz qyzmetiniń mamany Dınara Súıleımenovanyń aıtýynsha, shynaıy ómirden alynǵan oqıǵalardy arqaý etken mun­daı dramalyq qoıylymdar sottal­ǵandardyń minez-qulqyn túzep, jamandyqtan tyıylýyna kóp yqpal etedi. Búgingi ótip jatqan is-sharanyń maqsaty da osy – naǵyz ómiriniń der shaǵyn temir tordyń ar jaǵynda ótkizip jatqan azamattardyń júregine jylý uıalatyp, ózde­rin esh jamandyqqa qımaıtyn analarynyń, týǵan-týys, baýyr­larynyń bar ekenin esterine salý. Sol arqyly árkim­niń óz júris-turysyn, nıetin túzeýine yqpal etý.

Mekeme qyzmetkerleri mun­daı is-sharalardy turaqty túrde ótkizýdi josparlap otyr.

Qostanaı oblysy