«Eurasian Journal of Physics and Functional Materials» atty otandyq ǵylymı jýrnal alǵash ret Ortalyq Azııa men TMD kóleminde «Digital Commons Elsevier» platformasynda shyǵa bastady. «Elsevier» – álemdegi eń iri ǵylymı baspalardyń biri. Onda dúnıejúzindegi ǵylymı jýrnaldardyń barlyq maqalasynyń tórtten biri basylady.
Atalǵan jýrnal L.N. Gýmılev atyndaǵy Eýrazııa ulttyq ýnıversıtetinde 2017 jyldan beri aǵylshyn tilinde jaryq kóredi. Ǵylymı basylymnyń barlyq maqalasy «Scopus» halyqaralyq ǵylymı derekter bazasyna engizilgen.
Jýrnalda ıadrolyq fızıka, joǵary energııa fızıkasy, balamaly jáne sýtegi energetıkasy sekildi túrli saladaǵy ǵylymı zertteýlerdiń nátıjeleri týraly materıaldar qamtylǵan.
Basylymnyń halyqaralyq redaksııa alqasynyń quramyna Qazaqstan, Reseı, AQSh, Fransııa, Japonııa, Fınlıandııa, Shvesııa, Italııa, О́zbekstan, Anglııa ǵalymdary, sondaı-aq CERN jáne Birikken ıadrolyq zertteýler ınstıtýty sııaqty álemdik deńgeıdegi ǵylymı uıymdar kiredi.
«Elsevier» kompanııasy jýrnaldy bazaǵa qosý jáne elektrondyq nusqasyn shyǵarý týraly usynyspen shyqty. «Elsevier» platformasynda «Eurasian Journal of Physics and Functional Materials» jýrnalynyń jarııalanýy basylymnyń ǵana emes, otandyq ǵylymnyń damýyna da jańa múmkindik ashady. Bul Eýrazııa ulttyq ýnıversıtetimen birge elimizde júrgizilip otyrǵan ǵylymı zertteýler sapasynyń halyqaralyq deńgeıin moıyndaý», deıdi jýrnaldyń bas redaktory, EUÝ «Eýrazııalyq fızıka-energetıkalyq zertteýler jáne joǵary tehnologııalar ınstıtýty» ǴZI dırektory Qaırat Kúterbekov.