Jezqazǵan – Qyzylorda aralyǵynda avtokólik jolynyń syn kótermeıtin jaǵdaıy jóninde qanshama jyldan beri aıtylyp keledi. Prezıdent Qasym-Jomart Toqaev 2021 jyly Ekibastuz qalasynda ótken monoqalalardy damytýǵa baılanysty jıynda «Bul Jezqazǵan men Sátbaev qalalarynyń saýda-kólik baılanysyn kúsheıtýge, sonymen qatar júk tranzıtin arttyrýǵa múmkindik beredi» dep, bul joldyń tek aýmaqtyq qana emes, halyqaralyq deńgeıdegi mańyzdylyǵyna da nazar aýdardy. Sóıtip, kópshiliktiń kóńilindegi úmit oty qaıta janyp edi.
Sol jyldyń kúzinde «Eýropa qaıta qurý jáne damý banki» Qyzylorda oblysynyń aýmaǵyndaǵy uzyndyǵy 219 shaqyrym bolatyn avtojoldy rekonstrýksııadan ótkizýge qajetti qarajatty bólýge kelisimin bergeni jóninde aqparat tarady. Jalpy smetalyq quny 106,6 mlrd teńgeni quraıtyn jobanyń qurylys-montaj jumystary 2022 jyly bastaldy. Muny kórgen halyqtyń rızashylyǵynda shek bolmady. Biraq...
Jumystyń Qyzylorda jaǵynda qyz-qyz qaınap jatqanyn kórip júrgen jezqazǵandyqtardy «Bizdiń jaqtaǵy jóndeý jumystary qashan bastalady eken?» degen suraq mazalaı bastady. Alańdaýshylyqty «tender ótpeı qalypty, joǵary jaqta bul joldyń jóndelýine qarsy kúshter bar kórinedi» degen alypqashpa sóz odan ári údete tústi. El arasyna taraǵan «Qyzylorda jaǵyn «Eýropa damý banki» qarjylandyryp jatyr, al Ulytaý jaǵyn «Azııa damý banki» qarjylandyrýdan bas tartypty» degen sýyq sóz eldi ári-sári kúıge túsirdi. Sóıtip júrgende, 2023 jyldyń jaz mezgilinde atalǵan bank ókilderi Jezqazǵanǵa kelip, quny 90 mlrd teńge turatyn tenderge, baǵa ósimin eskergendikten, eshqandaı merdigerdiń qatyspaǵany sebepti, qaıta tender ótkizý kerektigin málimdep ketti. Sol jyly kúzde Ulytaý oblysyna kelgen Indýstrııa jáne ınfraqurylymdyq damý mınıstri M.Qarabaev 2023 jyldyń qazan aıynda tender ótip, joldy jóndeýge daıarlyq jumystary qarasha-jeltoqsan aılarynda bastalatynyn jetkizdi. Ulytaýlyqtar bul jaýapqa «tender emes, jol salynyp bitkendeı» qýanyp qaldy. О́kinishke qaraı, kóp keshikpeı tenderdiń ótpegeni týraly habar kelip jetti.
Qarapaıym halyq keıingi kezde «Qyzylorda jaǵyndaǵy jumys eki oblystyń shekarasyna deıin jetti. Al bizdiń jaq nege únsiz?» degen suraqty burynǵydan da jıi kótere bastady. Unjyrǵasy túsip ketken eldiń kókten izdegeni ótken aptada jerden tabyldy. Astana jaqtan «Joldyń «jyry» bitti, endi jóndeý bastalady» degen jaqsy jańalyq jetti. Ulytaý oblysy ákimdigindegi alqaly jıynda «QazAvtoJol» UK» AQ basqarma tóraǵasy Darhan Imanashev Jezqazǵan – Qyzylorda avtojolynyń Ulytaý oblysy aýmaǵyna qarasty bóligine qatysty tenderdiń sátti ótkenin jarııalady.
«Shynynda da, buryn jarııalanǵan tenderlerge merdigerler qatyspady, óıtkeni usynylǵan baǵa eshkimniń kóńilinen shyqpady. Bul joly bizdiń tarapymyzdan qurylys qajettiligine 156 mlrd teńge usynyldy. Segiz lot boıynsha jarııalanǵan tenderge 11 kompanııa qatysty, olardyń ekeýi – ózimizdiń kompanııa. Nátıjesinde, jalpy somasy 108 mlrd teńge usynǵan qytaılyq 4 kompanııa «jeńimpaz» dep tanyldy. Olardyń tórteýi de jol qurylysynda zor tájirıbe jınaqtaǵan kompanııalar», dedi Darhan Serikuly.
D.Imanashevtyń aıtýynsha, otandyq kompanııalar qurylys jumysyna qosalqy merdiger retinde tartylady. Sondaı-aq qurylysqa tolyqtaı otandyq materıal paıdalanylady.
«Máseleni tikeleı nazarynda ustap, qaıta-qaıta naqtylap otyrǵan el Prezıdentine ulytaýlyqtar atynan shynaıy alǵysymdy jetkizgim keledi. Jol paıdalanýǵa berilgen kezdegi paıdaly jaǵyn aıtpaǵannyń ózinde, qurylys jumystaryn júrgizýdiń ózi oblysymyzdyń ekonomıkalyq damýyna óziniń zor ıgi áserin tıgizedi», dedi oblys ákimi Berik Ábdiǵalıuly.
О́ıtkeni qurylysqa qatysty merdigerdiń bári Ulytaý oblysynda tirkeletin bolady, ıaǵnı oblys bıýdjetine qosymsha qarajat túsedi. Jergilikti mamandar, qarapaıym jumyskerler tartylady. Jolǵa qajetti qıyrshyq tas Jezqazǵannyń irgesinen tasylady. Qanshama tehnıka jumyldyrylady, solardy janar-jaǵarmaımen qamtamasyz etý qajet. Ártúrli qyzmet kórsetý kompanııalarynyń qajettiligi týyndaıtyndyqtan kásipkerlik te damı túsedi.
Sonymen, bir túıin tarqatyldy. Jospar boıynsha qurylys jumystary 2026 jyly aıaqtalýǵa tıis.
Ulytaý oblysy