Elimizdiń Qarýly kúshter qatary jańa ofıserlermen tolyqty. Bıyl memlekettik attestattaý komıssııasynyń sheshimimen 158 túlekke Ulttyq qaýipsizdik jáne áskerı ister magıstri dárejesi berildi.
Ulttyq qorǵanys ýnıversıteti jyl saıyn Qarýly kúshter bas shtabynyń akademııasy fakýltetinde jedel-taktıkalyq jáne jedel-strategııalyq deńgeıdegi basqarý mamandaryn daıyndap shyǵarady. Ofıserler magıstratýranyń bilim berý baǵdarlamasyna sáıkes teorııalyq oqytý men áskerı taǵylymdamanyń tolyq kýrsynan ótedi. Bıylǵy túlekter 9 mamandyq pen 22 biliktilik boıynsha Memlekettik attestattaý komıssııasy júrgizgen qorytyndy attestattaý barysynda joǵary bilimderin kórsetti.
Ofıserlik shen tapsyrý rásimine Qorǵanys mınıstriniń birinshi orynbasary – QK bas shtabynyń basshysy, general-leıtenant Sultan Qamaletdınov arnaıy keldi. Sóz arasynda ofıserlerdiń, bolashaq áskerbasylardyń jáne áskerı basqarý organdary basshylarynyń jańa pleıadasy daıyndalyp jatqanyn atap ótti.
– Egemen Qazaqstan Qarýly kúshteri qurylǵan alǵashqy kúnnen bastap normatıvtik-quqyqtyq bazany qalyptastyrýmen, uıymdyq-shtattyq qurylymdy ońtaılandyrýmen jáne áskerlerdi tehnıkalyq jaraqtandyrýmen qatar áskerı kadrlardy daıyndaýdyń kópdeńgeıli júıesin qurý basym baǵyt bolǵanyn atap ótken jón. Bul qadam búginde ózin tolyq aqtady deýge negiz bar. Ulttyq qaýipsizdikti qamtamasyz etýde adam áleýetine erekshe mańyz berilgen. El Prezıdenti – Joǵarǵy Bas qolbasshy Qasym-Jomart Toqaev Qarýly kúshterdiń odan ári damýyna basa nazar aýdaryp keledi. Bizge basqarý júıesin jańǵyrtý, qazirgi zamanǵy qarýly qaqtyǵystardyń tájirıbesin eskere otyryp, áskerlerdiń jaýyngerlik ázirligi men qabiletin arttyrý, materıaldyq-tehnıkalyq bazany jetildirý, robottandyrý men jasandy ıntellektini engizýmen aınalysý kerek. Armııanyń kadrlyq áleýetin nyǵaıtýdaǵy Ulttyq qorǵanys ýnıversıtetiniń róline toqtalǵanda, munda biregeı ǵylymı zertteý jáne bilim berý ortasy qurylǵanyn da eskerý mańyzdy. Aldaǵy ýaqytta da UQÝ-dyń damýy jalǵasyp, kelesi oqý jylynan bastap jańa kafedra, fakýltet pen zerthanalar ashylady. Sonymen qatar magıstranttar men doktoranttarǵa arnalǵan bilim berý baǵdarlamalary men pánder jelisi de keńeıtiledi, – dedi general-leıtenant Sultan Qamaletdınov.
Joǵary oqý orny vedomstvoaralyq ǵylymı bilim berý ortalyǵy bolyp esepteledi. Muny eskergen Qorǵanys mınıstriniń birinshi orynbasary quttyqtaý sózinde professorlyq oqytýshylar quramyna, ǵylymı qyzmetkerlerge alǵysyn bildirdi. Ári Qazaqstan armııasynyń qatary eń bedeldi áskerı oqý ornynda bilim alǵan joǵary bilikti mamandarmen tolyǵatynyn jáne túlekterdiń aldynda ofıserler korpýsynyń bedelin joǵary deńgeıge kóterý mindeti turǵanyn jetkizdi.
Bıyl magıstratýrany «Áskerı istegi strategııalyq menedjment» baǵdarlamasy boıynsha 8 ofıser bitirgen. Olardyń qatarynda oqýyn úzdik aıaqtaǵan polkovnık Murat Júsipov bar. Al oqýdyń barlyq kezeńinde jan-jaqty qamtamasyz etý fakýltetiniń túlekteri, podpolkovnık Dıas Qanafın men maıor Ivan Bıtıýkov óte jaqsy bilimin kórsetip, qorytyndy attestattaýdy tek «óte jaqsy» baǵaǵa tapsyrǵan.
Oqýdyń barlyq kezeńinde «óte jaqsy» degen baǵa alyp, qorytyndy attestattaýdan «óte jaqsy» ótken magıstranttarǵa tósbelgi berilip, olardyń aty-jóni oqý ornynyń Qurmet taqtasyna jazylady.
Bir aıta keterligi, bilim ordasy magıstratýranyń bilim berý baǵdarlamalary negizinde Qazaqstannyń basqa áskerleri men áskerı quralymdary úshin kadr daıyndaýdy júzege asyrady. Bıyl oqý ornyn Ulttyq ulannyń 23 áskerı qyzmetshisi, UQK Shekara qyzmetinen 14 adam jáne Tótenshe jaǵdaılar mınıstrliginen 5 adam bitirip shyqty. Sondaı-aq Tájikstan Respýblıkasynyń 16, Qyrǵyz Respýblıkasynyń 4 áskerı qyzmetshisi bar. Ýnıversıtette UQShU-ǵa múshe memleketterdiń ofıserleri de turaqty negizde oqyp, bilim alady.