Keıbir mekemelerde asa bir laýazymdy qyzmet atqarmasa da, abyroı-bedeli sol ujymnyń basshysynan kem emes mamandar bar. El-jurttyń, ujymnyń syı-qurmetine bólengen sala maıtalmandaryna árkez tórden oryn tabylady. Kásibiniń násibin kórip otyrǵan jandarmen Prezıdent Is basqarmasy Medısınalyq ortalyǵynyń ulttyq gospıtaline barǵanda júzdesken edik.
«Syrqattanǵan árbir jan et jaqynym»
Ádette, medısına qyzmetkerleri kúni desek, birden bas dáriger, tanymal hırýrgter eske túsedi. Barlyq marapat-madaq, izgi tilekter solarǵa ǵana aıtylatyndaı kórinedi de turady. Alaıda dárigerdiń senimdi serigi, adal kómekshisi – meıirgerlerdiń de eńbegin eskermeske bolmaıdy. Osy tusta biz Ulttyq gospıtaldiń meıirgeri Aıgúl Aıtbekqyzynyń aǵynan jarylyp aıtqan bir úzik syryn usynýdy jón kórdik.
«Bala kezde túrli mamandyqqa qyzyǵyp, anany-mynany armandaısyń. Bir qyzyǵy, aq halat kıip, adamdarǵa kómektesýge bala shaǵymnan qyzyqtym. Keıin, ol arman ómirlik maqsatyma aınaldy. Medısınalyq kolledjge oqýǵa tústim. 1989 jyly medısınalyq kolledjden soń sol zamanda «Sovmın» ortalyq aýrýhanasy dep atalatyn emdeý ornyna joldama aldym. Bıyl munda jumys istep júrgenime 35 jyl tolady eken. Jumys barysynda basshylyq meni shırasyn degen bolýy kerek, birden hali aýyr naýqastar jatatyn jansaqtaý bólimine jiberdi. Ajalmen betpe-bet kelgen naýqastardyń jaǵdaıyn jasaı júrip, áriptesterimnen úırengenim ushan-teńiz. Eń alǵash bizge asa qamqor bolǵan adam em-shara bólmesindegi tájirıbeli maman G.D.Kovalenko edi. Ol kisimen áli kúnge deıin áriptestik qarym-qatynasymyz úzilgen joq. Qazaqtyń betke ustar azamattary E.Serkebaev, Á.Dinishev, N.Tilendıev, R.Baǵlanova syndy talaı tulǵany emdeýge aralasyp, alǵystaryn alǵan sátterdi eshqashan umytpaımyn», dep ótken shaqty eske alady A.Aıtbekqyzy.
Jyldar jyljyp, jansaqtaý bóliminde shyńdalǵan Aıgúldi basshylyq 2-kardıologııalyq bólimge aǵa meıirgerlik qyzmetke jibergen. О́z isin jetik biletin maman onda taban aýdarmaı 10 jyl eńbek etipti. Bólimde túrli jastaǵy naýqastarǵa qaraılap júrgen Aıgúl Aıtbekqyzy «Syrqattanǵan árbir jan et jaqynym» degen ustanymdy tý etken meıirban jan. 2012 jyly ujym basshylyǵynyń sheshimimen Aıgúl klınıkadaǵy meıirgerlerge jetekshi bolyp taǵaıyndaldy. Ol aǵa meıirger qyzmetin atqarǵaly úsh márte Ulttyq akkredıtasııadan «óte jaqsy» degen baǵamen ótip, úsh ret halyqaralyq «Altyn standart» JCI belgisin alǵan. Bir aýrýhanada 35 jyl taban aýdarmaı jumys istep, kóptiń batasyn alǵan jany jaısań meıirgerge tolaıym tabys tileımiz.
«Keıde psıholog bolyp ketesiń»
Árbir salanyń ustyny – bilikti mamandar dep bilemiz. Keıipkerimiz Kúlsimhan Aıtjanqyzy 1985 jyly Almaty qalasyndaǵy qalalyq medısına kolledjin támamdap, eńbek jolyn №1 qalalyq balalar aýrýhanasynda operasııalyq meıirger bolyp bastaǵan. Sonda bilikti de bilgir mamandardan tájirıbe jıyp, ájeptáýir ysylyp qalǵan maman 1995 jyly №7 qalalyq klınıkalyq aýrýhanasyna shaqyrylady. Neırohırýrgııalyq operasııa meıirgeri bolyp jumys isteı júrip, qıyndyǵy mol mamandyqtyń qyr-syryn meńgergen Kúlsimhan Aıtjanqyzy «Sovmın» aýrýhanasyna jumysqa shaqyrylady.
О́z isiniń bilgiri Kúlsimhan Aıtjanqyzy salada 39 jyl eńbek etse, sonyń ishinde qazirgi Ulttyq gospıtalde 26 jyly ótipti. Kúlsimhan Muratova jumys barysynda operasııalyq meıirgerge tózimdilik, sabyrlyq, shynshyldyq sekildi qasıetterdiń aýadaı qajet ekenine kóz jetkizgenin aıtady. «Keıde psıholog te bolyp ketesiń. Naýqas adamnyń kóńilin aýlap, jyly sózińmen demeý oǵan kúsh beretinin baıqaısyń. Operasııa aldynda boıyn úreı bılegen adamǵa kerekti sóz taýyp aıtýdyń ózi tapqyrlyqty talap etedi», dedi maman bir sózinde.
Iá, operasııalyq meıirger – dárigerdiń birinshi kómekshisi ǵana emes, hırýrgııalyq toptyń múshelerin baılanystyratyn negizgi tulǵa. Ol operasııa barysynda hırýrgke kerekti quraldardy dárigerdiń qas-qabaǵyn baǵyp, aldyn-ala bilip turýy kerek. Hırýrgııalyq toptyń jumysy tepe-teńdikti, senimdilikti ári josparly operasııadan shuǵyl operasııaǵa aýysý jyldamdyǵyn talap etedi. Naýqastyń operasııadan keıingi aıtqan alǵysy men jyly lebizi dárigerlerdi, meıirgerlerdi qanattandyryp qana qoımaı, bilimin jetildirýge mindetteıdi. О́ıtkeni ómir men ólimniń arasynda jatqan naýqasty aıaqqa turǵyzyp, úmit syılaý – zor baqyt. Sol baqytty kúnder bar qıyndyqty umyttyrady.
ALMATY