Almatyda qordalanǵan másele az emes, órkenıettiń jalyna jarmasyp, damyǵan megapolısterdiń qataryna qosylý úshin áli de talaı sharýa atqarylýǵa tıis. Sonyń biri abattanyp úlgermegen aýdandar bolsa, Naýryzbaı aýdanyndaǵy qaraýsyz qalǵan aýmaqta oıyn jáne sport alańdary bar zamanaýı skver boı kótergeni jergilikti áleýmettiń kóńiline shýaq seýip, shyn máninde ómirlerin ózgertti.
Qazirdiń ózinde kún saıyn jańa skverge 800-ge jýyq bala baratyny belgili bolyp otyr. Almatynyń Naýryzbaı aýdany, Qalqaman shaǵyn aýdanyndaǵy kólemi 0,8 ga bolatyn jańa qoǵamdyq oryndy kórýge barǵan Almaty qalasynyń ákimi Erbolat Dosaev jergilikti turǵyndardyń rııasyz qoshemetine bólendi desek ásire aıtalǵan sóz emes.
Aqıqatynda buryn bul aýmaq qaraýsyz jatqan jer bolǵan, al qazir «Halyq qatysatyn bıýdjet» baǵdarlamasynyń arqasynda eldiń bos ýaqytyn ótkizetin ádemi jáne yńǵaıly keńistikke aınaldy. Kún saıyn alańǵa myńǵa jýyq adam barsa, joǵaryda atap ótkendeı, onyń 800-ge jýyǵy – balalar men jasóspirimder.
Jurtqa jaıly bolýy úshin 2 myń sharshy metr jaıaý júrginshiler aımaǵy abattandyrylyp, 17 balalar oıyn kesheni men 13 sporttyq trenajer ornatyldy, basketbol-voleıbol alańdary, fýtbol alańy, tennıs ústelderi bar. Sonymen qatar 400-den astam jasyl jelek otyrǵyzyldy, avtomattandyrylǵan sýarý júıesi ornatyldy, jańbyr sýyn burý úshin aryq júıesi jabdyqtaldy.
Jergilikti halyqqa qala ákimi Erbolat Dosaevpen dıdarlasýdyń sáti túsken kezde Naýryzbaı aýdanynyń turǵyny Záýresh Mustafaeva: «Jyl saıyn bizdiń aýdanda jańa demalys alańdary salynyp jatqanyna qýanyshtymyz. Buryn bul ýchaske qaraýsyz jatqan soń munda belgili bir turǵylyqty jeri joq jandar mekendeıtin. Qazir bul zamanaýı alańǵa aınaldy, munda barlyǵy qarastyrylǵan. Jańa demalys orny kishkentaı balalar úshin tipti jaqsy boldy. Olar kúndiz-túni osynda oınaıdy. Munda jasóspirimder men jastar sportpen shuǵyldana alady. Zeınetkerler de osynda demalady. Osy jerge patrýldik kúzetti kúsheıtýdi suraımyz», dedi.
Turǵyndarmen kezdesý barysynda qala ákimi Erbolat Dosaev Naýryzbaı aýdanynda qoǵamdyq qaýipsizdikti qamtamasyz etý úshin beınemonıtorıng júıesiniń 600 kamerasy ornatylatynyn jetkizdi. Olardyń úsheýi jańa alańǵa ornalastyrylǵan. Kameralardan beınematerıaldar birden qala polısııasyna kelip túsedi.
«Aldaǵy ýaqytta munda taǵy 4 kamera ornatyp, osy arqyly turǵyndardyń tolyq qaýipsizdigin qamtamasyz etemiz. Biz jańa formattaǵy skver saldyq. Munda ártúrli oıyn jáne sport alańdary, kishi sáýlet pishinderi, sonyń ishinde aǵashtan jasalǵandar bar. Birte-birte biz jergilikti turǵyndardyń jaıly ómir súrýi úshin jańa qoǵamdyq keńistikter quryp, jaqsartatyn bolamyz. Mysaly, biz Qarǵaly ózeniniń jaǵasynda serýendeý aımaǵyn qurýdy josparlap otyrmyz», dedi qala basshysy.
Oǵan qosa «Halyq qatysatyn bıýdjet» (HQB) aıasynda Naýryzbaı aýdanynda bıyl barlyǵy 2,5 mlrd teńgege 40 joba iske asyrylmaq.
Jalpy, Almatyda bıyl «HQB» jobasyna 18,8 mlrd teńge bólingen, bul ótken jylmen salystyrǵanda 5,8 mlrd teńgege artyq. Qala turǵyndary aýlalardy, qoǵamdyq keńistikterdi abattandyrý, sport jáne oıyn alańdaryn qurýda 364 joba usynyp, óz úlesterin qosýǵa, qalaýlaryn bildirýge múmkindik aldy.
ALMATY