Eger oqyrman esinde bolsa, byltyr maýsym aıynda Ulttyq quryltaıdyń ekinshi otyrysynda Memleket basshysy Qasym-Jomart Toqaev táýligine 24 saǵat jumys isteıtin kitaphanalar qurý týraly bastama kótergen edi. Qazirgi tańda osynaý usynys Almaty sııaqty úlken shaharda iske asyp jatyr.
Taıaý kúnderi megapolıste táýlik boıy jáne demalyssyz jumys isteıtin taǵy bir kitaphana paıda boldy. Bilimin baıytamyn degen, keregin izdegen oqyrmandar úshin 24/7 rejiminde jumys isteıtin kitaphana qaı turǵydan alsaq ta qolaıly.
Máselen, osy oraıda Almatynyń eki kitaphanasy – Jambyl atyndaǵy qalalyq jasóspirimder kitaphanasy men «Alatau Creative Hub» ortalyǵynyń kitaphanasy 2023 jyldyń qyrkúıek aıynan beri (2023-2024 oqý jyly) oqyrmandardy táýlik boıy qabyldaı bastaǵanyn aıta ketýge bolady.
Almaty qalalyq Mádenıet basqarmasy mundaı qadamdar oqýshylar, stýdentter, magıstranttar ǵana emes, doktoranttar arasynda óte qolaıly ekendigi alǵa tarta kele, Abaı dańǵyly, 141 mekenjaıynda ornalasqan kezekti kitaphana da endi jerde 24/7 rejiminde jumys isteıtindigin habarlady.
«Qazirge Almatyda úsh kitaphana oqyrmandardy 24 saǵat boıy qabyldaıdy. Kez kelgen adam ózine yńǵaıly ýaqytta kele alatyndyqtan, kitaphanaǵa kelýshilerdiń qarasy kóbeıdi. Naqtyraq aıtsaq, 2023 jylǵy qyrkúıek aıynan beri Jambyl atyndaǵy qalalyq jasóspirimder kitaphanasyna 27 650 adam kelse, «Alatau Creative Hub» ortalyǵynyń kitaphanasy 28 myń oqyrmanǵa qyzmet kórsetken. Jalpy, almatylyqtar kitap oqyǵandy jaqsy kóredi. Tek qalalyq kitaphanalardaǵy kórsetkishterge toqtalsaq, oqyrmandar jyl saıyn kem degende úsh mıllıon ret kelip-ketedi», deıdi Almaty qalalyq Mádenıet basqarmasynyń ókilderi.
Qazirgi tańda Almatyda 28 qalalyq kitaphana jumys isteıdi. Olardyń 95%-y jańǵyrtylyp, materıaldyq-tehnıkalyq bazasy men kitap qory tolyǵyp, jaıly oqý zaldary men ınternet-zaldar paıda boldy.
Almaty kitaphanashylary oqyrmandarǵa qyzmet kórsetý sapasyn arttyrý maqsatynda alǵash ret Ońtústik Koreıa, Germanııa jáne Shveısarııadaǵy úzdik kitaphanalarda taǵylymdamadan ótip keldi.
ALMATY