Elimizde ýaqyt beldeýiniń aýysýyna baılanysty jumys ýaqyty bir saǵat erte bastalýy múmkin, dep jazady Egemen.kz kaz.inform.kz-ke silteme jasap.
Bul týraly Úkimet otyrysynan keıin Eńbek jáne halyqty áleýmettik qorǵaý mınıstri Svetlana Jaqypova aıtty.
BAQ ókilderi mınıstrden: «Elimizdiń birqatar óńirinde ýaqyt beldeýiniń aýysýyna baılanysty jumys ýaqytyn bir saǵatqa erte bastaýǵa qatysty usynystar túsip jatyr. О́ıtkeni qystygúni qarańǵy erte túsedi. Osy usynysqa qalaı qaraısyz? Eńbek mınıstrliginiń jospary qandaı?», dep surady.
«Mınıstrlikke osy máselege qatysty hattar túsip jatyr, biz olarǵa jaýap beremiz. Jumys berýshi men jumysshynyń arasynda kelisimshart bar, jumys kestesin eki jaq birge jasaıdy. Sondyqtan qarańǵyda jumys istemeý úshin jumys berýshimen kelisip, jumys kestesin qaıta qaraýǵa bolady. Negizi bul kúrdeli suraq emes», dedi Svetlana Jaqypova.
Sondaı-aq vedomostvo basshysy jeke jáne bıýdjettik mekemelerge jumysty bir saǵat erte bastaý usynylǵanyn aıtty.
«Usynys berdik, ıaǵnı jumys bir saǵatqa erte bastalýy múmkin. Kelisimshart ekijaqty jasalady. Ol Eńbek kodeksinde jazylǵan, barlyǵy zańǵa sáıkes bolýy kerek», dedi Eńbek jáne halyqty áleýmettik qorǵaý mınıstri.