Saıası uıymnyń salmaqty betburysy

«Bul buǵan deıingi qundylyqtar men senimniń mańyzyn joımaıdy. Kerisinshe olardyń mazmuny zamanmen rýhtas bolýǵa tıis degen sóz. «Partııanyń rebrendıngin dál sol sebepti júrgizip jatyrmyz. Jyldar boıy qalyptasqan jaqsy dástúrlerdi saqtaımyz. Sóıtip, partııaǵa búgingi syn-talaptarǵa jaýap beretin jańa kelbet beremiz. О́tkendi dáripteı otyryp, ıdealdardyń jalaýyn jyqpaımyz», dedi S.Egizbaev.

Sezd ótken Zerendi mádenıet saraıynda aýyl adamdary men balalar beınelegen kartınalardyń kór­mesi uıymdastyryldy. Júzge jýyq týyn­dynyń árbirinde aýyl jáne ondaǵy tirshiliktiń bir sáti keremet kóri­nis taýyp tur. Bul – aýyldarda salynǵan myń­daǵan kartınanyń arnaıy baıqaýlar­da júldeli oryn alyp, sezge arnaıy iriktelip ákelingen úzdikteri.

«Aýyl» partııasynyń Májilis­tegi depýtattyq fraksııasy par­tııanyń saılaýaldy baǵdarlamasyn iske asyrý maqsatynda óńirlerdi aralap, halyq pikirine qulaq túrgen. Nátıjesinde, «Agrarlyq bank týraly» jáne «Azyq-túlik qaýipsizdigi týraly» eki zań jobasyn ázirlegen. Ekeýin de qos palatadaǵy 60 paıyzdan asa depýtat qoldaǵan. Partııa tóraǵasy bul baǵyttaǵy jumystar quzyrly memlekettik organdarmen jalǵasyn tabatynyn aıtty.

Premer-mınıstrdiń keńesshisi Eraly Toǵjanov «Sý tasqyny saldaryn joıýda sizderdeı jarqyrap alǵa shyqqan, jastar qurylys jasaǵyn túzip, sapqa turǵyzǵan eshkim bolmady» dep atap ótti. 

«Par­tııa­nyń saıası baǵdarlama­syn «Gúlden­se aýyl – gúldenedi elimiz» dep atadyq. Halyqtyń mádenı dástúri men rýhanı qundylyq­taryna negizdelgen, gúldengen aýyldary men qalalary bar agrarlyq, saıası turaq­ty, ekonomıkalyq kúshti, áleýmet­tik ádiletti, demokratııalyq, zaıyrly, quqyqtyq memleket qurýdy maqsat retinde aıqyndadyq», deıdi partııa basshysy.

Rasynda, búginde aýyl sharýa­shylyǵy ónimderin óndirýdiń mańyzy ushaq pen kompıýter jasap shyǵarýdan artyq bolmasa, kem emes. Pandemııa men geosaıa­sı oqıǵalardyń qasiretti sabaǵy azyq-túlik qaýipsizdigi kez kelgen memlekettiń ulttyq qaýipsizdiginiń negizgi elementi­ne aınalatynyn kórsetti. Tabystyń tómen deńgeıi aýyl turǵyndaryn qalaǵa kóshýge májbúr etedi. Jalpy, agrar­lyq óndiriste kiristiń tómen bolýy, otandyq aýyl sharýa­shylyǵynyń basty prob­lemasyna aınalǵan. Bul oraıda partııa memlekettik qoldaýmen aýyldyq kooperatıvterdi damytý qajet degen ustanymda.

«Aýyl» partııasy esepti kezeńde jaqyn jáne alys shetelderdiń saıası partııalarymen, qoǵamdyq halyq­aralyq jáne otandyq birles­tik­termen yntymaqtastyqty jan­dandyrǵan. Bıyldyń ózinde 30-dan astam kezdesý ótkizipti. Onda qyzmettiń túrli baǵyty boıynsha ózara is-qımyl máseleleri qaraldy. Qazir Azııa men Eýropanyń agrarlyq baǵyttaǵy 13 saıası partııa­symen, onyń ishinde Eýropa Par­lamentinde, Chehııa, Polsha, Lıtva, Belarýs, Qyrǵyzstan, О́zbekstan par­lamentterinde óz fraksııasy bar partııalarmen qarym-qatynas ornatý júrip jatyr.

«Birikken Ulttar Uıymynyń azyq-túlik jáne aýyl sharýashylyǵy uıymymen» (FAO), «Aýyl ákimderin oqytý máseleleri boıynsha Konrad Adenaýer qorymen», «Qazaqstan –German agrarlyq-saıası dıalogi» uıym­darymen yntymaqtastyq týraly keli­simder jasamaqshy. «Túrkııa túlek­­teri qaýymdastyǵymen» «Túr­kııa býrs­lary baǵdarlamasy», «Ber­lın Eýra­zııalyq klýby», «Potsdam klımattyq ózgeristerdi zertteý ınstıtýty», taǵy basqa halyq­aralyq uıym­darmen kásiptik baǵdar berý jumystaryn júr­gizýdi jos­parlapty.

Jastardy patrıotızm, birlik jáne týǵan jerge degen súıis­pen­shilik rýhynda tárbıeleý aıasynda Qazaqstan halqy Assamb­leıasymen, Ulttyq volonterler jelisimen birqatar memorandým­ǵa qol qoıǵan. Sondaı-aq Ulttyq agrar­lyq ǵylym akademııasymen jáne Agro­kolledjder qaýym­das­ty­ǵymen memo­randýmda agro­óner­kásip keshenin ǵylymı jáne kad­rlyq qamtamasyz etý máselesin talqylaǵan.

Ýaqyt talabyna saı jańǵyrǵan partııaǵa tolyq rebrendıng jasaldy, partııa ataýy men logotıpine kıiz úı tańdalǵan.

Saıası is-sharada aýyl men ondaǵy turmys-tirshilikke qatysty kóptegen másele kóterilip, ony sheshý joldary qarastyryldy.