Qazaqstan halqy Assambleıasy Hatshylyǵynyń «Jomart jan» gýmanıtarlyq ortalyǵy aıasynda «Qazaqstan halqy Assambleıasynyń respýblıkalyq qory» qoǵamdyq qory Qostanaı oblysyndaǵy sý tasqynynan zardap shekken otbasylarǵa jaıly baspana alyp berdi, dep habarlaıdy Egemen.kz.
Qor basshysy Rafık Mırzoevtiń aıtýynsha, atalǵan qoǵamdyq uıym sý tasqynynan zardap shekken azamattarǵa belsendi túrde kómek kórsetýdi jalǵastyrýda, óıtkeni olardyń kópshiligi qıyn ómirlik jaǵdaıǵa tap bolyp, baspanasynan aıyrylǵan.
«Sý tasqynyna deıin balalarymyzben páter jaldap júrip, óz úıimiz qashan bolady eken dep armandaıtynbyz. Tabıǵı apat ómirimizdi tas-talqan etti, bar nársemizden, tipti jaldap turyp jatqan ýaqytsha baspanamyzdan da aırylyp qaldyq. Qazaqstan halqy Assambleıasynyń arqasynda óz páterimizge kóship, jańa ómirdiń paraǵyn ashtyq. Buǵan áli de sene alar emespin, óńim emes, túsim sııaqty», deıdi Aıman Qadyrhanqyzy.
Zardap shekken otbasylardyń ishinde birinshi bolyp Arqalyq qalasynan Qazovtarǵa kómek kórsetildi. Aıman Qadyrhanqyzy kámeletke tolmaǵan tórt balasymen sý tasqyny kezinde baspanasyz qalǵan. Qoǵamdyq qor olarǵa Arqalyq qalasynan tórt bólmeli páter alyp berip, jańa ári jaıly baspanamen qamtamasyz etti.
«Osyndaı qıyn-qystaý kezde jalǵyz qaldyrmaı, qol ushyn sozǵan Qazaqstan halqy Assambleıasy men ákimdikke alǵysym sheksiz. Jańa páter bolashaqqa degen senimimizdi nyǵaıtty», dep rızashylyǵyn bildirdi.
Rafık Iаgýbovıch qordyń maqsaty tabıǵı apat saldarynan qıyn ómirlik jaǵdaıǵa tap bolǵandarǵa qoldaý kórsetý jáne olardy qolaıly jaǵdaılarymen qamtamasyz etý ekenin atap ótti.
Esterińizge sala keteıik, búginde Arqalyq qalasynda kóktemgi sý tasqyny kezinde baspanasyz qalǵan otbasylar úshin jańa 50 páterlik «Smart» turǵyn úı salynyp jatyr.