Premer-mınıstr Oljas Bektenov Qyzylorda oblysynda jańa JEO qurylysynyń barysymen tanysty. Sondaı-aq jospardaǵy shyny klasterine qatysty tabaq shyny óndiretin ınvestısııalyq jobany kórip, Memleket basshysynyń óńdeý ónerkásibiniń úlesin ulǵaıtý jónindegi tapsyrmasynyń oryndalýyn tekserdi.
Qazir óńir turǵyndaryn 1964 jyly paıdalanýǵa berilgen JEO jylýmen qamtamasyz etip otyr. Búginde jabdyqtyń tozýy 75%-dy quraıdy. Ortalyqtandyrylǵan jylýmen jabdyqtaý júıesine 2 949 nysan, onyń ishinde 808 kóppáterli úı qosylǵan. Bıyl osy nysandardy ystyq sýmen qamtamasyz etý úshin Prezıdent qoıǵan mindetti iske asyrý sheńberinde Úkimet rezervinen 11 mlrd, qalalyq qazandyqtardy jóndeýge taǵy 2 mlrd teńge bólindi. Sonymen qatar jylý jelilerin jańǵyrtýǵa respýblıkalyq bıýdjetten 6 mlrd teńge baǵyttalǵan. Qabyldanǵan sharalar jylý trassalarynyń tozýyn 42%-ǵa deıin tómendetýge múmkindik beredi.
Sondaı-aq Premer-mınıstrge jylý qýaty saǵatyna 277 Gkal bolatyn jańa JEO qurylysynyń qarqyny týraly baıandaldy. Qazirgi ýaqytta jer qazý jumystary aıaqtalǵan. Jabdyqty ornatýǵa negiz qalanyp jatyr. Qurylys alańyna 600-ge jýyq adam, 60 tehnıka jumyldyryldy. Jumys josparǵa sáıkes júrip jatyr. Nysandy 2025 jyly paıdalanýǵa berý josparlanǵan. Osy kezde ınvestor jobany iske asyrýǵa 70 mlrd teńgeden astam ınvestısııa saldy.
Úkimet basshysy el ekonomıkasynyń belsendi damýyna jáne ónerkásiptik kásiporyndardyń iske qosylýyna baılanysty qosymsha energııa qýaty qajet ekenin aıtty. «Jańa JEO qurylysy Memleket basshysynyń erekshe baqylaýynda. Onyń iske qosylýy ońtústik óńirdegi elektr energııasynyń júktemesin turaqtandyrýǵa jáne tutastaı alǵanda elimizdiń energetıkalyq qaýipsizdigin nyǵaıtýǵa oń áserin tıgizedi», degen O.Bektenov oblys ákimdigine gaz jetkizýshi qubyr men JEO qurylysyn ýaqtyly aıaqtaý týraly, sondaı-aq barlyq nysandardyń jylý berý maýsymyna daıyndyǵyn qamtamasyz etý jóninde tapsyrma berdi.
Qyzylorda oblysy óńdeý ónerkásibinde óndirilgen ónim kórsetkishiniń ósý qarqyny boıynsha kósh bastap tur. О́ńir basshysynyń orynbasary Ardaq Zebeshev Premer-mınıstrge óńirdegi ónerkásiptiń damýy týraly áńgimelep berdi. Bıylǵy 5 aıda ekonomıkanyń osy sektory 6,3% ósim kórsetipti. Sondaı-aq ınvestısııa kólemi 40%-ǵa artqan. Onyń 80%-y – jeke salymdar. 2024-2028 jyldar aralyǵynda 8,4 myń jumys ornyn quryp, jalpy somasy 1,1 trln teńgege 76 jobany iske asyrý kózdelgen. Osy jyldyń ózinde 32,4 mlrd teńge somasyna 15 joba iske qosylady.
Shyny zaýytynyń iske qosylýy damýǵa aıryqsha serpin beredi. Qazirgi tańda shyny klasterin qurý jumystary bastaldy. Kásiporyn jumys istegen ýaqyt ishinde 27,3 mlrd teńgege 20,8 mln sharshy metr shyny óndirildi. Búginde kásiporyn 15 mln dollar kólemindegi óz qarajatyna qýaty jylyna 5 mln sharshy metr energııany únemdeıtin shyny shyǵaratyn jańa jelini iske qosty.
Úkimet basshysy el ekonomıkasy úshin mańyzdy jobalarǵa qarajat salýǵa daıyn ınvestorlarǵa qoldaý kórsetý qajet ekenin aıtty. Sondaı-aq jumys sapary aıasynda jol-kólik ınfraqurylymyn damytý máselesine nazar aýdardy. Atap aıtqanda, «Qyzylorda – Jezqazǵan», «Qyzylorda – Úshqudyq» avtomobıl joldaryn salý jáne «Qyzylorda – Aqtóbe» avtomagıstralin rekonstrýksııalaý jobalary bar. Kólik mınıstrligine qajetti jumystardy júrgizýge jáne jobalardy ýaqtyly aıaqtaýǵa tıisti qujattardy resimdeý jóninde tapsyrma berdi.