Bul kúnderi «Taza Qazaqstan» jalpy respýblıkalyq bastamasy senbilikter aıasynan shyǵyp, tosyn da sony bastamalarǵa túrtki bolyp jatqany qýantady. Mysaly, «Taza Qazaqstan» megapolıste «Almaty jazy» aksııasyna ulassa, osy iske jaýapty mekemeler 6 shildege deıin jalǵasatyn tazalyq jumystaryna jastardy da jumyldyryp otyr.
Almatyda 150 sýburqaq bar bolsa, onyń 66-sy kommýnaldyq, 84-i jekemenshik aýmaǵynda ekendigin, al kommýnaldyq menshiktegi sýburqaqtar 1 mamyrdan 25 qazanǵa deıin kúndelikti tekserilip, tazalanyp, jumys istep turǵanyn aıtýǵa bolady. Alaıda jekemenshik aýmaqtaǵy sýburqaqtardyń jaǵdaıy máz emes, qaraýsyz qalǵan, jumys istemeıdi ıakı kúrdeli jóndeýdi talap etetindikten, «Almaty jazy» aksııasy jekemenshik aýmaǵyndaǵy sýburqaqtar qalpyna keltirýdi kózdep otyr.
Oǵan qosa uzyndyǵy 1 525 shaqyrym bolatyn aryq jelilerin tazartý jumystary kúsheıtiledi. Kún saıyn Almatynyń aryqtarynan shamamen 250 tekshe metr laı men qoqys shyǵarylady. Kóktem shyqqaly tynymsyz júrgizilip jatqan tazalyq jumystaryna qaramastan aryqtardy nóser jańbyr kezinde turǵyndar tastaǵan qoqys-qaldyqtar bitep, aınalasyn kól-darııa etip jatady. Qansha jerden eskertilse de, ókinishke qaraı, kommýnaldyq qyzmet nóser jańbyrdan keıin aryqtardy jórgekter, eski-qusqy zattar men ydys-aıaq, tipti kólik dóńgelekteri men qurylys qaldyqtarynan tazartyp otyrýǵa májbúr.
«Almaty jazy» aksııasy eki apta ishinde 624 aıaldamany, 222 baǵdarsham men 2 181 jol belgisin jýyp, ózen jaǵalaýy men sý aıdyndary aýmaǵyndaǵy shamamen 250 sharshy shaqyrym jerdi qoqystan tazartýdy josparlap otyr.
Sol sııaqty jazda aýla ishindegi qoqys konteınerleriniń tez tolyp qalatyny da másele týǵyzatyndyqtan, 1 454 konteınerlik alańdy sanıtarlyq óńdeýden ótkizilip, 700 konteınerlik alań jýylyp, zalalsyzdandyrylyp, 24 747 qoqys jáshigi tazartylady.
Eger Almatyda aınalyp ótýge bolmaıtyn eski másele bar deıtin bolsaq, ol – ózegi qýraǵan aǵashtar. Dińi shirip turǵan aǵashtar jel shaıqaǵanda adamdarǵa ǵana emes, múlikke, kóleńke izdegen kólikterge de qaýip tóndirip jatady. Sondyqtan «Almaty jazy» aksııasy kezinde 6 myńǵa jýyq aǵash sanıtarlyq maqsatta kesiledi.
Kóńilge shýaq uıalatatyn taǵy bir jaıt, «jasyl» eńbek jasaqtaryndaǵy belsendiler qatary kóbeıip keledi. «Eń aldymen, «Jasyl el» jobasy aıasynda «Jas ecopatrol» ekologııalyq jasaqtary monıtorıng jumystaryn júrgizip jatqanyna toqtalǵym keledi. Nátıjesinde, qala aýdandarynda 15-ten astam iri ruqsatsyz qoqys oryndary bar ekendigi anyqtaldy, bul qaldyqtardy zańsyz jınaý máselesiniń bar ekenin kórsetedi. Sondaı-aq ózenderdi lastaýǵa qatysty 150-den astam zań buzýshylyq anyqtaldy», deıdi Almaty qalasynyń «Jasyl el» jáne «Jas ekopatrýl» jastar ekologııalyq jasaqtarynyń basshysy Ádil Nurpeıisov. Aıtýynsha, anyqtalǵan keleńsizdikterge baılanysty jaýapty mekemelerge 50-den astam suraý salynyp, 100 shaqty aryz jazylǵan.
«Jasyl el» eńbek jasaqtaryn qurý joǵary oqý oryndary men ekologııalyq uıymdar arqyly júzege asyp jatyr. 700-deı adam atsalysatyn bıylǵy «Jasyl el» jobasy Kóktóbede tusaýyn kesip, ekologııalyq normalar boıynsha trenıngter men nusqaýlyqtar ótkizildi. Atalǵan jobanyń tıimdiligi kóp-aq. Jazǵy demalysta jastar bosqa sandalmaı, bir-birimen aralasyp, tabys taýyp, qala tazalyǵy qalaı qamtamasyz etiletinin túısinedi.
ALMATY