Mádenıet jáne aqparat mınıstri Aıda Balaeva Qytaı Halyq Respýblıkasynyń Mádenıet jáne týrızm mınıstri Sýn Elımen kezdesti. Taraptar eki el arasyndaǵy mádenı-gýmanıtarlyq saladaǵy yntymaqtastyqty nyǵaıtý máselelerin talqylady.
Qazaqstan men Qytaı memleketteri arasynda dıplomatııalyq qarym-qatynas osydan 32 jyl buryn, ıaǵnı 1992 jyldyń 3 qańtarynda ornady. Shırek ǵasyrdan astam ýaqyt ishinde eki el strategııalyq áriptes ári yntymaqtastyǵy berik elge aınaldy. Dıplomatııalyq kelisim aıasynda ózara birqatar qujatqa qol qoıyldy. Sáıkesinshe, eki el arasynda mádenı almasýlar odan ári tereńdeı tústi.
Kezdesýde Aıda Balaeva tóraǵa Sı Szınpınniń memlekettik sapary jáne onyń ShYU Memleketter basshylary keńesiniń Sammıtine qatysýy elder arasyndaǵy ekijaqty qarym-qatynasqa jańa serpin beretinine aıryqsha toqtaldy. Sondaı-aq Qytaı tarapyn Astanadaǵy Qytaı mádenı ortalyǵynyń sátti tirkelýimen quttyqtady.
– Qazaqstan men Qytaı úshin mádenı ortalyqtardyń ashylýy aıtýly oqıǵa bolatyndyǵyn aıta ketý mańyzdy. Osy baǵyttaǵy ózara baılanys bolashaqta tek qarqyndy túrde damyp, eki el halqy úshin oń nátıje beredi. Bul mádenı alań halyqtarymyzdyń bir-birine jaqyn bolýyna múmkindik beredi dep senemin, – dedi mınıstr.
Otyrysta Mádenıet jáne aqparat mınıstrliginiń arhıv salasynda, Qytaıdaǵy Qazaqstanǵa qatysty tarıhı qujattar men jádigerlerdi qaıtarý boıynsha yntymaqtasa jumys isteýge daıyn ekeni sóz boldy. О́z kezeginde, Qytaı Halyq Respýblıkasynyń Mádenıet jáne týrızm mınıstri birlese qyzmet etýge ázir ekenin jetkizdi. Baǵdarlama boıynsha keliskennen keıin Qytaı tarapy dereý jumysqa kirisip, tıisti organdarǵa qujattar tapsyratynyn aıtty.
– Elderimizdiń mádenı yntymaqtastyǵy halyqtarymyz arasyndaǵy ózara túsinistik pen dostyqty nyǵaıtýda sheshýshi ról atqarady. Biz birlesken mádenı jobalar men bastamalardyń úlken áleýetin kórip otyrmyz, – dedi Sýn Elı.
Kezdesý sońynda taraptar basqosý elder arasyndaǵy mádenı-gýmanıtarlyq baılanystardy odan ári damytýǵa taǵy bir qadam bolatynyna senim bildirdi.