Qaraǵandy oblysynyń Nura ózeninen 15 jastaǵy oqýshy qyzdyń máıiti tabyldy. Quzyrly organdar úsh kún boıy izdeý jumystaryn júrgizgen, dep jazady Egemen.kz.
29 maýsymda 13 jáne 15 jastaǵy eki oqýshy qyzdyń Buqar jyraý aýdany Qyzyljar aýyly mańynda sýǵa batyp ketkeni habarlanǵan edi. Olardyń biri birden tabylyp, ekinshisin izdeý úsh kúnge sozylǵan. Izdeý jumystaryna Tótenshe jaǵdaılar departamenti, polısııa jáne Temirtaý ańshylar men balyqshylar qoǵamynyń 40 qyzmetkeri, týystary men jergilikti turǵyndar jumyldyrylǵany aıtyldy. Qutqarýshylar Nura ózeniniń túbin, arnasyn, jaǵalaý aımaǵyn teksergen.
Atalǵan oblystyń TJD baspasóz qyzmeti: «Búgin tańǵy saǵat 08:50-de súńgýirler 15 jastaǵy qyzdyń máıitin tapty. Ol ózennen shomylý ornynan shamamen 1300 metr qashyqtyqta tabyldy. Izdestirýge 40 adam, 9 tehnıka, 7 júzý quraldary jumyldyryldy. Izdeý jumystaryn júrgizý nashar kóriný jáne aǵynǵa baılanysty qıyndady. Bul oqıǵa sýdaǵy qaýipsizdik erejelerin saqtaýdyń mańyzdylyǵyn kórsetedi», dep habarlady.