Bıylǵy Ulttyq quryltaıda jastardyń kitap oqýyna aıryqsha toqtalǵan Memleket basshysy Qasym-Jomart Toqaev: «Kitap oqıtyn el zııaly ultqa aınalady. Biz jas urpaqtyń kitapqa qushtarlyǵyn oıatýymyz kerek», dep aıtty. Osyǵan oraı Mádenıet jáne aqparat mınıstri Aıda Balaeva Prezıdent bastamasyna ún qatyp, óskeleń urpaqtyń kitap oqýǵa qyzyǵýshylyǵyn arttyrý maqsatynda «Aýyl kitaphanalaryna – 100 kitap» atty aksııasyn bastaǵan edi.
Bul aksııany L.N.Gýmılev atyndaǵy Eýrazııa ulttyq ýnıversıtetiniń ǵalymdary qyzý qoldap, aýyl turǵyndaryna kitap oqýdy nasıhattaý, olarǵa kásiptik baǵdar berý jumysyn júrgizý, ýnıversıtetke daryndy jastardy tartý maqsatynda Pavlodar, Abaı, Shyǵys Qazaqstan oblystaryna issaparmen baryp keldi.
Eýrazııa ulttyq ýnıversıteti rektorynyń keńesshisi Abzal Taltenovtiń aıtýynsha, ǵalymdar shalǵaı aýdandar men aýyl turǵyndaryna qazaq qalamgerleriniń úzdik shyǵarmalaryn ǵana emes, tanymdyq-aǵartýshylyq baǵyttaǵy ádebıetter men ýnıversıtet ǵalymdarynyń kitaptaryn tartý etken.
«Bul aksııany ýnıversıtet rektorynan bastap, barlyq professor-oqytýshy qoldady. Biz osy aksııa aıasynda alystaǵy Qaraterek, Jarma, Birlik, Salqyntóbe, Altaı aýyldarynyń kitaphanalaryna keıingi shyqqan 400 jańa týyndyny syılap, jas urpaqtyń kitap oqýǵa qyzyǵýshylyǵyn arttyrýdy maqsat ettik. Endi bul bastamaǵa basqa da joǵary oqý ornyndaǵy áriptesterimiz belsendi atsalysady dep senemiz», dedi ol.
El bolashaǵyn jarqyn etýde jastardyń úlesi zor. Sondyqtan taǵylymdy bastama aýyl jastarynyń qoǵamdyq oı-sanasyn jetildirip, rýhanı ósýine de óz septigin tıgizeri anyq.