Resmı statıstıkalyq málimetterge sáıkes, 2024 jyldyń qańtar-naýryz aralyǵynda 1 mln 493 myń Qazaqstan azamaty el ishinde saıahattaǵan. Ishki týrıster sany ótken jyldyń sáıkes kezeńimen salystyrǵanda 145 myń adamǵa kóbeıdi, dep habarlaıdy Egemen.kz Týrızm jáne sport mınıstrligine silteme jasap.
Almaty, Astana jáne Shymkent qalalary jalpy ishki týrıster úlesiniń 46%-yn tarta otyryp, ishki týrıstik baǵyttar arasynda kóshbasshy atandy.
О́tken jyldyń birinshi toqsanymen salystyrǵanda Qazaqstannyń 14 óńirinde týrıster sany birshama óskeni baıqaldy. Ásirese, 187%-ǵa ósim kórsetken Batys Qazaqstan oblysy erekshe kózge túsip otyr.
«2024 jyldyń birinshi toqsanynda ishki týrızm kórsetkishteriniń aıtarlyqtaı óskenin kórip otyrmyz. Bul - týrıstik ınfraqurylym men qyzmet kórsetý sapasyn jaqsartý baǵytyndaǵy maqsatty jumysymyzdyń nátıjesi. Biz Qazaqstandy álemniń túkpir-túkpirinen kelgen týrıster úshin odan da tartymdy etýge tyrysamyz. Sondaı-aq ishki saıahattar úshin qolaıly jaǵdaı jasaı otyryp, osy sektordy serpindi damytýdy jalǵastyramyz», dedi Týrızm ındýstrııasy komıtetiniń tóraǵasy Nurtas Káripbaev.