Memleket ustanatyn basym baǵyttyń biri – ınvestısııalyq ahýaldy jaqsartý, óńdeý ónerkásibin ekonomıkanyń lokomotıvine aınaldyrý.
О́nerkásip jáne qurylys mınıstrligi ónerkásip komıtetiniń tóraǵasy Azamat Panbaevtyń pikirine súıensek, elimizde ındýstrııalyq saıasatty iske asyrý jalǵasyn taýyp keledi. Keıingi 5 jylda óńdeý ónerkásibiniń ortasha ósý qarqyny 4,5%-dy qurap otyr. Onyń ishinde mashına jasaý salasyndaǵy ósim – 17,6%.
Ulttyq ekonomıkaǵa, onyń ishinde otandyq óndiristiń órisin keńeıtýge quıylǵan ınvestısııanyń ıgiligimen jergilikti turǵyndar úshin jumys orny kóbeıedi.
Sonyń bir dálelindeı, Atyraý oblysynda júk vagonyn qurastyratyn jańa zaýyt ashyldy. Oblys ákiminiń orynbasary Marat Mýrzıevtiń aıtýynsha, munaıly óńirde sheteldiktermen birlesken myń-nan astam kásiporyn jumys isteıdi. Al mashına jasaý salasynda 150 iri, orta jáne shaǵyn bıznes nysany bar.
«Aımaqta munaı-hımııa ónimderin óńdeý baǵytynda iske asyrylyp jatqan iri jobalar bar. Endi mashına jasaý óndirisine nazar aýdarylyp otyr. Bul ınvestısııalyq jobanyń óńir úshin mańyzy zor. Birinshiden, «Teńiz» ken ornyndaǵy keleshek keńeıý jobasynyń aıaqtalýyna baılanysty bosaǵan jumysshylardy jumyspen qamtý máselesin ońynan sheshýge septigin tıgizedi. Ekinshiden, eksportqa baǵyttalǵan ónimderdiń ósimine yqpal etedi. Úshinshiden, óńirdiń áleýmettik-ekonomıkalyq damýyna serpin beredi. Sol sebepti, oblys basshylyǵy tarapynan osyndaı óndiristi ashýǵa nıet etken ınvestorlarǵa jan-jaqty qoldaý kórsetiledi», deıdi M.Mýrzıev.
Aıtýynsha, jańa zaýytta jobaǵa sáıkes 6 myń vagon qurastyrý josparlanyp otyr. Investısııalyq jobanyń qýaty birtindep artqan kezde 2 700 jumys orny qurylady. Soǵan oraı zaýytta usta, dánekerleýshi, burǵylaýshy, toıtarýshy sekildi san túrli beıindegi mamandarǵa suranys artady. Zaýytta vagon men sısterna shyǵarý, jóndeý, tehnıkalyq qyzmet kórsetýge arnalǵan barlyq ınfraqurylymdy qamtıtyn vagon jasaý klasteri qurylady. Vagon qurastyrýǵa nemis stanoktary men elimizde óndirilgen materıaldar qoldanylady. Al óndiristik ónimder Eýropa jáne Baltyq elderine eksporttalady.
Zaýytty iske qosqan «Texol» kompanııalar tobynyń basshysy Shota Avhazovanyń deregine qaraǵanda, jańa óndiriske salynǵan ınvestısııa kólemi az emes. Máselen, bastapqy ınvestısııanyń kólemi shamamen 170 mln dollardy quraıdy. Al jobany tolyq júzege asyrý kezindegi ınvestısııa 160 mlrd teńgege jetýi múmkin.
«Temirjol vagony da eskiredi. Aldaǵy 10 jyldyń ishinde eldegi júk vagony parki jyl saıyn 54 myńǵa qysqarady. Osyǵan baılanysty Ortalyq Azııadaǵy júk bazasynyń ósý áleýetin eskerdik. Tozǵan vagondardy jańasyna almastyryp, parkti jańartýdy kózdedik. О́ıtkeni vagon parkine suranys artatyny daýsyz», deıdi Sh.Avhazova.
Mashına jasaý, onyń ishinde vagon qurastyrý salasy mamandarynyń topshylaýynsha, jańa óndiris ornynda ostik júktemesi 23,5 myń tonnany kóteretin jartylaı vagondar men platformalardy qurastyrý kózdelipti. Sondaı-aq júk vagonyn, munaı ónimin, suıytylǵan gazdy jáne ónerkásiptik júkterdi tasymaldaýǵa arnalǵan sısterna qurastyrý maqsaty bar. Zaýyt tolyq qýatyna 2027 jyly kóshedi.
Qazir 17 myń sharshy metr aýmaqty alyp jatqan óndiristik alań aldaǵy 4 jylda 62 myń sharshy metrge deıin keńeıedi. Birneshe sehta vagon qurastyrýǵa qajetti san alýan komponent jınaqtalady. Sondaı-aq munda ortasha jáne kishi syıymdylyq pen salmaqtaǵy vagondardy quıý jelisi iske qosylǵan.
Zaýytta jańa úlgilerdi óndiriske engizý qolǵa alynyp, qazir 25 myń arba men 13-6741 úlgisindegi artıkýlıasııalanǵan fıtıng platformasynyń modelin engizýdiń qamy jasalyp jatyr. Alda suıytylǵan kómirsýtekti gazdy tasymaldaýǵa arnalǵan sısternalar shyǵaryla bastaıdy. Vagon qurastyrýǵa qajetti metall konstrýksııalary – Qaraǵandydan, moıyntirekter – Stepnogordan, dońǵalaqty juptarǵa arnalǵan dıskiler men oster Ekibastuzdan ákelinedi. Qazir zaýytta 70-ten asa maman jumys istep júr. Jyl sońyna deıin jumysshylar sany 180-ge jetedi. Al 2027 jylǵa qaraı 2 700 adamdy turaqty jumyspen qamtý kózdelip otyr.
Atyraý oblysy