Bokstan Qazaqstan áıelder quramasy Parıj Olımpıadasy qarsańynda sońǵy jattyǵý jıynyn ótkizip, daıyndyqtaryn pysyqtaıdy, dep jazady Egemen.kz.
Quramanyń bas bapkeri Eldos Saıdalın joldama ıegerleriniń Olımpıadaǵa daıyndyǵy qalaı ótkenin aıtty.
«Jaqynda ǵana Janashar aýylyndaǵy bazada eki aptalyq jattyǵý jıynyn oıdaǵydaı ótkizdik. Olımpıadaǵa baratyn úsh boksshymyzǵa komandadaǵy ózge sportshylar kómekke keldi. Qazir qurama músheleri azdaǵan úzilis aldy. 8 shildede qaıta jınalamyz», dedi bas bapker.
Sondaı-aq qurama Parıjde baq synaıtyn boksshy qyzdarǵa sparrıng qarsylas aparmaq nıette.
«21 shildede Parıjge ushyp ketemiz. Keıin sol jaqtaǵy jaǵdaıǵa qaraı jattyǵýdy jalǵastyramyz. Boksshy qyzdarymyzdyń jaǵdaıy jaqsy. Olardy Olımpıadaǵa naǵyz babynda aparý − bizdiń mindetimiz.
Olımpıada oıyndaryna úsh qyzǵa sparrıngtik seriktes bolatyn taǵy úsh boksshyny alyp ketýdi josparlap otyrmyz. Ázirge naqty kimniń baratynyn aqyldasyp jatyrmyz», dedi E.Saıdalın.