Prezıdent Qasym-Jomart Toqaev turǵyn úıdi gazdandyrý jumystaryn baqylaýynda ustap otyr. Tipti, Úkimet pen ákimdikke kógildir otyn tartýdy jedeldetýdi tapsyrdy. Kenshiler qalasyn gazdandyrý búginde 4 kezekti 16 iske qosý keshenin qamtıdy. Birinshi kezek boıynsha Qazybek bı aýdany men qalanyń Mıhaılov bóligi gazǵa sátimen qosyldy.
Gaz taratý jelileri 4 166 jeke turǵyn úıge jalǵandy. Osy jyldyń 28 mamyryna jeke tulǵalar úshin kógildir otynǵa qosylýǵa 3 046 tehnıkalyq shart berilip, 2 459 úı qajetti jabdyqpen qamtyldy. 5 jyl merzimge paıyzsyz nesıe rásimdeý arqyly jańǵyrtý arqyly taǵy 260 úıge gaz kirip úlgergen. Jumysty ármen qaraı jalǵastyrý úshin ákimdik jańǵyrtý ortalyǵyna qosymsha taǵy 300 mekenjaı tizimin berdi.
– Gazdy árkim óz qaltasynan qarajat shyǵara salyp, qosa almaıtyny anyq. Sondyqtan turǵyndarǵa paıyzsyz, bólip tóleý óte tıimdi. Úıine gaz tartqysy keletinder bizge habarlasady. Merdiger gazǵa qosylý aqysyn esepteıdi. Biz ony ataýly merzimge paıyzsyz negizde bólip, merdigerge qarajatyn tóleımiz. Al qosylǵan úı ıesi mejelengen ýaqyt aralyǵynda bereshegin birtindep óteıdi. Byltyr bul baǵdarlama qanatqaqty qalypta iske qosylyp, ájepteýir tıimdiligin kórsetken edi. Nátıjesi bar. 300-ge tarta úı kógildir otynǵa qosyldy. Bıyl 70 úı gazben qamtyldy. Endigi jospar boıynsha 420 úı mejelendi. Gazǵa qosylýdyń ortasha baǵamy 800 myń teńgeden bastalady, – deıdi oblystyq turǵyn úı qoryn jańǵyrtý ortalyǵy dırektorynyń orynbasary Álibek Adenov.
Kırzavod aýmaǵy, Taýgúl jáne Kúngeı shaǵyn aýdandary mańyndaǵy 4, 5, 6 iske qosý keshenderine jaýapty taldyqorǵandyq «MBK Qurylys» jaýapkershiligi shekteýli seriktestigi merdiger bolyp tanylsa, tehnıkalyq qadaǵalaý «GrandTaýerServıs» uıymyna júktelgen. Besinshi iske qosý kesheninde merdiger eski áýejaı aýdanynda Shtýrmanskaıa, Samal kóshelerinde gazben jabdyqtaýdyń oramishilik jelisi tartylyp, abonentke jalǵaýdyń 512 toraby ornatyldy. 29 tehnıka, 100-ge tarta sala mamany jumys istep júr. Endi 2026 jyly Álıhan Bókeıhan aýdanyn gazdandyrýdy jobalaý jumystary bastalady.
Reıdovaıa kóshesiniń turǵyny Ábiken Kýshkenov jylda 7-8 tonna kómir jaǵyp kelgen. Endi kúni-túni peshke otyn jaryp, kómir salyp júrmeımin deıdi.
– 2011 jyldan beri osynda turamyn. Otbasymyz úlken. Kóshemizge gaz tartý jumysy jedel júzege asyp jatyr dep ashyq aıtar edim. Jumyskerler yń-shyńsyz sharýasyn istep jatyr. Pesh jaǵyp júrip, keıde barar jerimizden qalyp qoıyp jatatyn edik. Endi umyt boldy. Basy bastalǵan eken, aıaǵy oıdaǵydaı támamdalsa eken. Kómir jyl saıyn qymbattamasa, arzandamaıdy. Tonnasy – 22 myń teńge. Ortalyqtandyrylǵan gazdy kópten beri taǵatsyzdana kútken edik, – deıdi Ábiken Dostaıuly.
«QAZAQGAZ AIMAQ» AQ kompanııasy gaz taratý jelilerine tehnıkalyq qyzmet kórsetýge jáne jóndeýge jaýapty. Turaqty tekserip, ony ýaqtyly jóndep otyrsa, onda ol gazben jabdyqtaýdyń qaýipsizdigin saqtaýǵa kepil.
– Gazǵa qaýipsiz ári kepildi negizde qosylý aıtqanǵa ońaı bolǵanymen, is júzinde saqtyqty talap etedi. Ár turǵyn bizdiń taraptan tehnıkalyq shart alady. Kez kelgen qarapaıym abonent tehnıkalyq qujatty tegin ıemdenedi. Aryzyn jazǵan adam úıiniń tehnıkalyq kýáligin, jeriniń aktisi men jeke kýáligin kórsetedi. Munan soń qurylys jumysy jalǵasady. Nátıjesinde mamandarymyz jabdyqtyń qaýipsizdigin tekserip, gaz taratady. Tarıfke keletin bolsaq, aldymen shyǵyn esepteledi. Árıne, kóptegen kúrdeli úıler barlyǵyn da eskeremiz, – deıdi «QAZAQGAZ AIMAQ» AQ óńirlik óndiristik fılıaly dırektorynyń orynbasary Amandyq Táńirbergenov.
Qaraǵandy qalasynda 7 018 turǵyn kógildir otynǵa qosylý múmkindigine ıe. Jalpy alǵanda gazdandyrý jumystary ótken jylmen salystyrǵanda áldeqaıda ósken.
– 2022 jylǵy saraptamaǵa kóz júgirtsek, 500 úı gazǵa qosylǵan. 2023 jyly bul kórsetkish 1 500 úıge jetti. Bıyl qańtar aıynan beri eseptegende 500 úıge kógildir otyn jetken. Jyl sońyna deıin bul kórsetkish áli de ósedi. Aıta ketetin jaǵdaı, kez kelgen turǵyn úıge gaz tartýy úshin tehnıqalyq shart alýy mindetti. Al ol qujatty jeńildetý maqsatynda bizdiń fılıal úsh baǵytta jumys isteıdi. Iаǵnı kez kelgen turǵyn úıinde otyryp, eGov portaly arqyly nemese fılıal saıtyna kirip ótinish qaldyra alady. Tipti bolmasa, keńsege kelip, mamandardyń kómegine júginýge bolady, – dedi fılıal dırektorynyń orynbasary Amandyq Táńirbergenov.
Gazdandyrýdyń birqatar artyqshylyǵy bar. Birinshiden, ekologııalyq jaǵdaı aıtarlyqtaı jaqsarady. Kómirmen jylytýdan tabıǵı gazǵa aýysý atmosferaǵa zııandy zattyń shyǵaryndysyn edáýir azaıtady. Ekinshiden, gazdandyrý jańa jumys oryndaryn qurý jáne ınvestısııa tartý arqyly aımaqtyń ekonomıkalyq damýyna edáýir yqpal etedi. Úshinshiden, turǵyndar úshin tıimdi.
Qaraǵandy oblysy