Kúni keshe ǵana el astanasynda Mega Silk Way ortalyǵynda «Shulamah» fılminiń jabyq kórsetilimi ótti. Atalǵan týyndy mýzykalyq drama janrynda túsirilgen. Fılm Mádenıet jáne aqparat mınıstrliginiń tapsyrysy boıynsha «Ulttyq kınony qoldaý memlekettik ortalyǵy» KeAQ jáne Golden Man Media qoldaýymen jaryqqa shyǵyp otyr.
Aıta ketsek, «Ulttyq kınony qoldaý ortalyǵy» ulttyq ıdeologııa men patrıotızm rýhyn nasıhattaıtyn kınokartınalarǵa demeý kórsetip keledi. Atalǵan fılm elimizdiń mýzyka salasyndaǵy progressıvti jastardyń kózqarasyn baıandaıdy. Elimizde talantty jastar kóp, bul rette kıno ortalyǵy ónerli órenderdi qoldap, kreatıvti ındýstrııany damytýǵa úles qosyp jatqany málim.
Budan bólek, memleket tarapynan atalǵan máselege erekshe kóńil bólinip keledi. Sonyń nátıjesinde otandyq kınoındýstrııa jańa da jasampaz jolyn qalyptastyryp jatyr. Atap aıtsaq, 2023 jyldyń ózinde 18 ulttyq fılm túsirildi, sondaı-aq byltyr jyl sońynda taǵy 18 kınojoba iriktelip, óndiriske jiberildi.
«Bıyldan bastap kınogerlerdiń usynysy eskerilip, Ulttyq kınony qoldaý ortalyǵynyń kınojobalardy irikteý konkýrsyna ózgeris engizildi. Saraptap qarasaq, bıylǵy konkýrsqa birshama ótinim kelip túsken. Anımasııa, derekti, oıyn fılmderi sanaty boıynsha 465 ótinim tirkelgen. Osylaısha, 101 ssenarıı kelesi kezeńge joldandy, al ekinshi kezeńde 87 joba irikteldi. 18-20 maýsym kúnderi aralyǵynda pıtchıng ótti. Saraptama keńesiniń músheleri ulttyq kınoǵa súbeli úles qosatyn kınokartınalardy irikteýge bar kúsh-jigerin saldy. Al memleket kınematografııa salasyna turaqty qoldaý kórsetýdi jalǵastyra bermek», deıdi Ulttyq kınony qoldaý ortalyǵynyń baspasóz qyzmeti.
Aıta ketý kerek, «Shulamah» fılminiń rejısseri Aıtóre Joldasqalı «Sheker» serıalymen tanymal, al Igor Saıdy Gollıvýdtaǵy jobalary arqyly kópshilik biledi. Fılm sıýjeti reper bolýdy armandaıtyn úsh dostyń aınalasynda órbıdi. Olar «Sýla» esimdi prodıýsermen betpe-bet kelgende, jetistikke jetý jolynda qıyndyqtardy eńserý qajetin túsinedi. Daryndy akterlerdiń, sonyń ishinde Demeý Atymtaev, Dosan Kenshimbaev pen Almaz Merjaqypovtyń, sondaı-aq tanymal mýzykalyq prodıýserler men oryndaýshylardyń qatysýymen «Shulamah» kórermenderdi óziniń atmosferasymen tańǵaldyrady.
«Joba prodıýserleri basty keıipkerlerdiń róline kásibı akterlerdi tartýǵa emes, kastıng ótkizýge den qoıdy. Osylaısha, elimizdiń túkpir-túkpirinen 300-ge jýyq ótinim kelip tústi, biraq tańdaý Demeý Atymtaevqa, Dosan Kenshimbaevqa, Almaz Merjaqypovqa tústi. Sondaı-aq fılmge mýzykalyq prodıýserler men áıgili oryndaýshylar, sonyń ishinde: HIRO, VSXV Prince, Shiza atsalysty. Sonymen qatar epızodtarda kórermender Say Mony jáne birqatar blogerdi kóredi», dep atap ótti shyǵarmashylyq top.
Jańa týyndy 11 shildeden bastap elimizdiń barlyq kınoteatrlarynda kórsetile bastaıdy. Al 12 shildede mýzykalyq albomnyń jaryqqa shyǵýy josparlanyp otyr.