10 shilde kúni Prezıdent Qasym-Jomart Toqaev Parıj olımpıadasynda Memlekettik týymyzdy ustap shyǵatyn boksshy Aslanbek Shymbergenov pen jeńil atlet Olga Safronovaǵa rámizimizdi tabystady. Mańyzdy kezdesýden keıin bokstan Qazaqstan quramasynyń kapıtany Aslanbek Shymbergenov armany týraly sóz qozǵady, dep jazady Egemen.kz.
Búginde álem chempıonyna aınalǵan boksshyny alǵash jattyǵý zalyna týǵan aǵasy jetelep ákelgen. Aslanbek Shymbergenov barlyq sportshy sekildi olımpıadaǵa qatysyp, altyn medal alýdy maqsat etkenin jetkizdi.
«Olımpıadanyń altyn medalin alý. Bul armanymdy oryndaý úshin bar kúshimdi salamyn. 2004 jyly Baqtııar Artaev aǵamyz Olımpıada chempıony atanǵan soń, týǵan aǵam meni boks seksııasyna ertip keldi. Sodan beri jattyǵyp, sporttyń bul túri ózime unap qaldy. Endi, mine, jazǵy Olımpıadada elimizdiń týyn kóterip shyqpaqpyn. Eń birinshi kezekte, bul úlken mártebe, úlken jaýapkershilik. Týymyzdy jelbiretip baryp, jelbiretip qaıtamyz», dedi boksshy.