Arbaǵa tańylǵanymen, jumystan qol úzbeı kele jatqan Darhan Hamıtovtiń ónerine, ómirge degen qulshynysyna qarasańyz, sandalyp, jumys tappaı júrgen zińgitteı jigitterdi aıap keter edińiz. Darhan shetkeri jatqan Bozsha aýylynda turady. Sonyń ózinde elektr tehnıkalaryn jóndetýge aýdannyń túkpir-túkpirindegi aýyldardan tapsyrys túsedi.
Tehnıkanyń tilin jaqsy meńgergen sheber kásibin dóńgeletip otyr degen soń, kúre joldan úsh shaqyrymdaı jerdegi Bozsha aýylyna arnaıy burylǵanbyz. Darhan sheber magnıtofon, sháýgim sekildi usaq-túıek tehnıkalardy arbasy aınala qoımaıtyndaı shaǵyn bólmede otyryp jóndeıdi. Al jazdyń kúni aýlasyndaǵy garajdy sheberhanaǵa aınaldyrady.
– Teledıdar, kóliktiń magnıtofonyn, «Otaý tv» sekildi turmystyq tehnıkalardy jóndeımin. Qystyń kúni usaq zattardy úıdegi shaǵyn sheberhanada jóndesem, teledıdar sekildi dúnıeni basqa bólmege shyǵaryp alyp, qurastyramyn. Jazda jaqsy, keń garajda jumys isteı berýge bolady, – deıdi Darhan Tólepqazyuly.
Onyń eńbekqorlyǵyna, bilimine jerlesteri rıza. Alaıda jer betindegi pende taǵdyrdyń jazýynan qaıda qashyp qutylady? Sheber bıyldan bastap densaýlyǵyna baılanysty I-topqa ótken. Úkimet tarapynan 569 myń teńge bólinip, jańa arbaǵa qol jetkizgen. Aıtýynsha, ol arbasy tórt jylda bir jańartylyp otyrady. Sonymen qatar memleket tarapynan arnaıy aıaqkıim berilgen. Odan bólek, dári-dármek, em-dom jaǵynan da kómek bar desedi. Belgili bir ýaqytta saýyqtyrý sanatorıılerine baryp ta tynyǵady, emin alyp keledi. Qamqorshy bolyp otyrǵan joldasyna da tıisti tólem qarastyrylǵan eken.
Darhan Tólepqazyuly osydan tórt jyl buryn memleketten 560 myń teńge grant alyp, kásibin keńeıtken. Elektr tehnıkalaryn jóndeý úshin qural-jabdyqtar alǵan, taǵysyn taǵy. Baıqaǵanymyzdaı, Darhan avtokólikterdiń dabyl belgilerin de ornatady. Shyndyqty aıtsaq, bilimdi avtoelektrıkter qalalyq jerdiń ózinde tapshy. Mundaı sheberlikti qaıdan úırendiń deımiz ǵoı Darhanǵa, sóıtsek bala kúninen ákesi baýlypty.
– О́zim tehnıkaǵa kishkentaı kúnimnen qyzyqtym. Magnıtofon sekildi dúnıelerdi buzyp, qaıta qurap júretinmin. Sol qyzyǵýshylyǵymdy baıqaǵan ákem 12 jasymnan bastap, baǵyt-baǵdaryn bere bastady. Oqytty, tárbıeledi. Sonyń arqasynda nan taýyp otyrmyz, – deıdi sheber.
Darhannyń sheberligin shyńdaýǵa taǵy bir sebep bolǵan – aýylǵa 4G ınternetiniń tartylýy edi. Oǵan deıin tehnıka jóndeýdegi túıtkildi suraqtardyń jaýabyn ózi izdep, sharq uryp júrse, qazir ınternet ıiriminen kez kelgen suraqqa jaýap tabady. Tipti etap boıynsha kórsetip turyp beredi. Darhannyń qoly uzartqany – sol. Aıtyp otyrǵandaı, tapsyrys úzilmeıdi. Kúnine kemi eki-úsh elektr tehnıkasyn jóndep jiberedi. Osylaısha, otbasyn asyrap, qarapaıym kún keship jatyr. Kásip munymen toqtamaıdy deıdi. Ákimdik tarapynan taǵy qoldaý bolsa, sheberhanasyn aýdan ortalyǵy Aqjardan ashýdy kózdep otyr. Ol degenimiz, jalpy aýdan turǵyndary úshin qolaıly bolmaq.
Shyǵys Qazaqstan oblysy,
Tarbaǵataı aýdany,
Bozsha aýyly