Premer-mınıstrdiń orynbasary Qanat Bozymbaev sý tasqyny saldarynan týyndaǵan kúrmeýli máselelerge den qoıý problemalaryn taldaý boıynsha keńes ótkizdi, dep jazady Egemen.kz.
Keńeste tótenshe jaǵdaı kezinde jedel den qoıý úshin respýblıkalyq jáne óńirlik shtabtardyń ókilettikterin keńeıtý, tehnıka men jabdyqtardy tasymaldaý tetigi, sondaı-aq tabıǵı apattar kezinde múlikti saqtandyrý máseleleri talqylandy.
Qanat Bozymbaev Qarjy, TJ, Eńbek jáne halyqty áleýmettik qorǵaý mınıstrlikterine zardap shekkenderge ótemaqy tóleý tártibin qaıta qaraýdy tapsyrdy.
Ulttyq ekonomıka mınıstrliginiń derekteri boıynsha, shaǵyn jáne orta bıznes (ShOB) sýbektilerinen shyǵyndy ótý boıynsha jalpy somasy 3,4 mlrd teńgege 291 ótinim kelip túsken. Qarajat Úkimet rezervinen bólingen, biraq ótinish berýshilerdiń úshten biri ǵana qarajatqa qol jetkizgen.
Sý tasqyny kezinde tehnıkanyń jetispeýshiligi máselesi týyndady. Ony basqa oblystardan kóshirý boıynsha jedel sharalar qabyldandy. Birqatar óńirde ákimder qolda bar avtopark sany týraly aqparatty bilmegen, keńeste tehnıkany arnaıy esepke alý qurylymyn qarastyrý máselesi ortaǵa salyndy.
«Kólik mınıstrligi osy talqylaýdy eskere otyryp, tehnıkany, onyń ishinde jeke uıymdarmen tıeý, jetkizý jáne túsirý algorıtmin pysyqtaýy qajet. Olardy TJ aımaqtaryna tartý jáne jetkizý úshin shyǵyndardy óteý tetigin kózdeý kerek. Munyń bárin zańnamalyq turǵydan rettep, bir aı merzimde kelisilgen usynystar engizý qajet», dedi Qanat Bozymbaev.
TJ kezinde azamattardyń múlkin saqtandyrý máseleleri jáne apattar oblıgasııasyn shyǵarý múmkindigi qaraldy.
«Biz búgin bıylǵy sý tasqyny boıynsha qorytyndy jasap, kelesi jyldyń sý tasqyny kezeńine daıyndyqty bastaý úshin arnaıy jınaldyq. Qazir biz turǵyn úıdi qalpyna keltirý jáne zalaldy óteý boıynsha barlyq jumystardy ýaqtyly aıaqtaýymyz kerek. Eń bastysy, zardap shekkender kúzge deıin baspanamen qamtamasyz etilýi tıis. Kóktemge deıin áli ýaqyt bar. Biraq sý tasqyny kezeńine daıyndyq sharalary kúzde aıaqtalýy kerek. Sý tasqyny qatelikti, oryndalmaǵan jumystardy jáne jetkiliksiz qarjylandyrýdy keshirmeıdi», dedi vıse-premer.