Osydan bes jyl buryn Maqsut Narikbayev University bastamasymen joǵary oqý oryndaryndaǵy akademııalyq adaldyq pen etıka qaǵıdasyn nyǵaıtý maqsatynda akademııalyq adaldyq lıgasy (lıga) quryldy. Sodan beri atalǵan uıym ózin ádil jáne transparentti bilim berý ortasyn qalyptastyryp, etıkalyq standarttardy ilgeriletken ınstıtýt retinde kórsetti. Qazir onyń qyzmetinen barynsha adal jáne ashyq akademııalyq alań qurýǵa degen umtylysty baıqaımyz.
Bes jyl ishinde lıga 18 ýnıversıtettiń basyn qosyp, tájirıbe almasýǵa, netvorkıngti damytýǵa jáne birlesken jobalardy iske asyratyn mańyzdy alańǵa aınaldy. Lıganyń negizgi jetistikterine standarttar men akademııalyq qyzmettiń ártúrli baǵyty boıynsha nusqaýlyq ázirleý, monıtorıngter men aýdıt júrgizý, oqytý materıaldary (beınedárister toptamalary) men sıfrlyq platformalardy daıyndaý jáne onyń halyqaralyq akademııalyq adaldyq ortalyǵy (ICAI) sııaqty bedeldi uıymdardaǵy belsendiligi kiredi.
Búginde atalǵan uıym Q.Jubanov atyndaǵy Aqtóbe óńirlik ýnıversıtetimen birlesip, kelesi jylǵa arnalǵan strategııalyq jospar ázirleý ústinde. Buǵan akademııalyq adaldyq boıynsha halyqaralyq konferensııa men semınar ótkizý, AIRS 2.0 standartyn (ICAI) engizý, jańa sıfrlyq platformalar daıyndaý, akademııalyq etıka boıynsha dóńgelek ústel uıymdastyrý, qoldanystaǵy tájirıbelerdiń monıtorıngi sekildi is-sharalar ótkizý qamtylǵan.
Qazirden Maqsut Narikbayev University úlgisimen Astana medısına ýnıversıteti men Qaraǵandy medısına ýnıversıteti ózderiniń «Akademııalyq adaldyq dashbordy» jónindegi tájirıbesimen bólisýge daıyn. «Power BI» negizindegi bul qural ártúrli ónim kórsetkishi men akademııalyq adaldyq boıynsha esepti tıimdi baqylaýǵa jáne taldaýǵa múmkindik beredi. Dashbord kómegimen akademııalyq adaldyq deńgeıin baqylaýǵa jáne ony arttyrý jolyn oılastyrýǵa kómektesetin vızýaldy esepterdi (grafıkter, dıagrammalar, baǵalardy bólý qısyǵy) daıyndaýǵa bolady.
Akademııalyq adaldyq lıgasynyń jobalyq keńsesiniń basshysy Nurgúl Mahanbaevanyń aıtýynsha, mundaǵy jetistik – lıganyń halyqaralyq deńgeıde moıyndalǵan seriktes atanýy.
«Bizdiń basty nátıjemiz lıganyń shtab-páteri AQSh-ta ornalasqan halyqaralyq akademııalyq adaldyq ortalyǵyna qosylýy der edim. Bul ortalyqqa álemniń ár túkpirinen 200-den astam ýnıversıtet múshe. Al bizdiń lıga – elimizdegi bul ortalyqqa múshe jalǵyz uıym. Sondaı-aq Maqsut Narikbayev University-niń ózi de – atalǵan ortalyqqa múshe joǵary oqý orny», dedi ol.
Búgingi kúni akademııalyq adaldyq lıgasyna qyzyǵýshylyq joǵary. 10-nan astam ýnıversıtet oǵan qosylýǵa nıet bildirgen. Lıgaǵa kirgisi keletin oqý oryndary barlyq aqparatty alý úshin qoldaý kórsetetin jobalyq keńsege júgine alady. Qazirgi tańda elimizdegi akademııalyq adaldyqty kúsheıtýmen belsendi aınalysatyn negizgi eki memlekettik uıym – Ǵylym jáne joǵary bilim mınıstrligi men Sybaılas jemqorlyqqa qarsy is-qımyl agenttigi.
Qysqasy, biz sóz etken uıym Qazaqstannyń jáne basqa da elderdiń barlyq joǵary oqý oryndarynyń akademııalyq adaldyq mádenıetin damytýǵa, joǵary bilim berý standarttaryna umtylýǵa jáne bilim berý sapasyn arttyrýǵa shaqyrady.