Jýyqta kezekti eńbek demalysyna shyǵyp, kindigim kesilgen Baı-О́lkege bardym. Ádettegideı aımaqtyq mýzeıge bas suqtym. Tórde turǵan alyp dombyra birden kózge shalyndy.
Jádigerge janar toqtatyp qaradyq: dombyranyń qulaqburaý qondyratyn ushar basynda ań búrip otyrǵan búrkit beınesi qashalypty. Qyran qus beımálim mıstıkalyq janýardyń quıqasyn sheńgeldep otyr. Uzyn moınyna 20 jerden perne ornatyp, bes jerine súıekten jonyp jasaǵan japyraq oıý shekitilipti.
Dombyranyń moıyntuǵyryna Baı-О́lkeniń gerbisi qondyrylyp, astyna aq samyrsyndy sheńberlep oıyp, ortasyna júrekkóz oıý salypty. Jádigerdiń qasbetiniń qos qaptalyn qazaqtyń qoshqar múıiz órnegimen qaptaǵan. Shanaqtyń tıek ornalasqan bóliginiń ústine kishkentaı sary mys taqta shekitilipti. Oǵan «Bul dombyrany mýzeıge Stambýl Ábdihanulynyń otbasy syılady. Salmaǵy – 100 kılo, bıiktigi – 3 metr. Erdenet qalasynyń turǵyny, sheber Ch.Enh-Otgon jasady. 2014 jyl» dep jazylǵan eken.
Osy taqtada aıtyp, aty atalǵan «Stambýl Ábdihanuly» kim degenge toqtalsaq, bul adam 1940 jyly Baı-О́lke jerinde týypty. Uzaq jyl Erdenet ken baıytý óndirisinde qatardaǵy shahter, keıin alyp mashına «BelAz» kóligin júrgizipti. 2001 jyly Mońǵolııa prezıdentiniń jarlyǵymen «Eńbek sińirgen óndirisshi» ataǵyn alypty. 2019 jyly baqıǵa attanǵan. Marqum sonaý bir qıyrda júrse de, týǵan jerine myna bir jádigerdi syılap ketipti.