Premer-mınıstrdiń orynbasary Tamara Dúısenova Jambyl oblysyna sapary aıasynda Moıynqum, Shý jáne Merki aýdandarynda bolyp, «Aýyl amanaty» baǵdarlamasynyń iske asyrylý barysyn tekserdi.
Tarazdan 300 shaqyrymdaı jerdegi Moıynqum negizinen shóleıtti aımaq sanalady. Alaıda munda da mal sharýashylyǵyn óristetýge múmkindik bar. Máselen, Birlik aýylynda «Baıbaraq-Agro» kooperatıvi qurylǵan. Oǵan ázirge 30-dan astam adam birikken. «Aýyl amanaty» baǵdarlamasy aıasynda 35,8 mln teńgege 20-ǵa jýyq aýyl sharýashylyǵy tehnıkasy satyp alynyp, aýylǵa qyzmet kórsetip jatyr. 400 gektar shabyndyq jerden iri qara, usaq malǵa qajetti azyq daıyndalady. Aýdan túıe sharýashylyǵyn júrgizýge qolaıly. Biraq sharýalar ázirge et pen shubat óndirýmen shektelip keledi.
Aýyl sharýashylyǵy kooperatıviniń qyzmetimen tanysqan vıse-premer Tamara Dúısenova aýyl turǵyndaryna taýarly nesıe berý tetigin qarastyrý týraly atap ótti.
«Tek shaǵyn nesıe arqyly kóp túıe alý múmkin emes. Sondyqtan agroónerkásip kesheninde taýarly nesıe tetigin paıdalaný mańyzdy. Elimizde atalǵan tájirıbeniń sátti júzege asyp jatqan mysaly jeterlik. Jambyl óńirinde saqtandyrý tetigin engizý usynylyp otyr. Bul tetik barlyq tarap úshin tıimdi dep sanaımyn», dedi vıse-premer.
Túıe sharýashylyǵyn júrgizýge qolushyn sozýǵa daıyn basqa óńirlerden kelgen kásipkerler bar. Máselen, Almaty oblysynda 5 myń túıe asyrap, onyń ónimderin tereń óńdeýmen aınalysatyn «Dáýlet-Beket» seriktestigi jumys isteıdi.
«Túıe sharýashylyǵynyń damýyna barynsha kúsh salý qajet. Eger jergilikti turǵyndar nıet bildirse, 100 túıe berip, ony baptaýǵa qajetti keńes berýge ázirmiz. Munda túıe sútin óńdeýge qajetti shaǵyn zaýyt salýǵa da járdemdese alamyz», deıdi seriktestik ıesi Sydyq Dáýletov.
Shý aýdanynda vıse-premer aýyldyq bıznesti damytýdyń óndiristik baǵytymen tanysty. Birlikústem aýylynyń turǵyny Nurzat Qoshqarbaev birneshe jyldan beri kirpish shyǵarý isimen aınalysyp, kúnine myńǵa jýyq danasyn óndirip kelgen. Memlekettik baǵdarlama aıasynda 8,6 mln teńge kóleminde nesıe alyp, óndiris qýatyn eki ese arttyryp otyr.
«Qazir kúnine 2 000 dana shyǵarýǵa qaýqarlymyz. Buǵan deıin 2 adam jumys istep kelgen edi, búginde 8 qyzmetker bar. О́nimge suranys joǵary. Shýdan bólek, Moıynqum, Merki, Qordaı aýdandarynan tapsyrystar kóptep keledi», deıdi kásipker.
Al Qoraǵaty aýylynyń turǵyny Nurǵalı Jeksenbıev jubaıymen birge tigin sehyn ashqan. Kerekti qurylǵylar satyp alyp, jergilikti balabaqshalarǵa qajetti tósek jabyndary, jastyq qaptaryn tigip, satyp otyr. Kásibin keńeıtýdi maqsat etedi. Alaıda tiginshi tabýda qıyndyqtar týyndap otyr. Jergilikti ákimdik bul máseleni mansap ortalyǵy arqyly mamandar oqytý jaǵynan qoldaý kórsetip jatyr.
Vıse-premer jobalardy oń baǵalap, týyndaǵan máselede memlekettik baǵdarlamanyń tetikterin tıimdi paıdalanyp, aýyldyq jerlerde ómir súrý deńgeıin qalaı jaqsartýǵa bolatynyn tilge tıek etti.
«Qazirgi tańda «Kúmis jas» baǵdarlamasy júzege asyp jatyr. Odan bólek, memleket tarapynan sýbsıdııalanatyn áleýmetti jumys oryndary tetigi bar. Jastar praktıkasy jobasyn da qarastyrý qajet. Jalpy alǵanda aýyl turǵyndarynyń turmysyn jaqsartýǵa baǵyttalǵan birqatar qoldaý sharasy bar. Olar týraly keńinen nasıhattaý qajet», dep atap ótti T.Dúısenova.
Jambyl oblysynda «Aýyl amanaty» jobasy aıasynda jergilikti turǵyndarǵa aýyl sharýashylyǵyn júrgizý daǵdylary úıretiledi. Bul baǵyt negizinen «Qaryzsyz qoǵam» jobasy qatysýshylaryna baǵyttalǵan. Máselen, «Amanat» partııasynyń bastamasymen Merki aýdanynda «Agrosaýat» atty agrobiliktilik ortalyǵy ashyldy. Nysanda egin, qus jáne mal sharýashylyǵyn júrgizýge qatysty teorııalyq jáne tájirıbelik kýrstardy aqysyz negizde oqytý uıymdastyrylǵan.
Partııa hatshysy Eldar Jumaǵazıev mundaı ortalyqtardyń aýyl turǵyndarynyń tabysyn arttyrý úshin mańyzdylyǵyn atap ótti. О́z kezeginde Tamara Dúısenova bastamany joǵary baǵalap, ony odan ári qaraı keńinen taratý múmkindigin qarastyrý qajettigin atap ótti.