Aldaǵy 8-14 qyrkúıek aralyǵynda Astanada ótetin Dúnıejúzilik kóshpeliler oıyndarynyń dúbiri de jaqyndap qaldy. Jalpaq álem kóz tigip otyrǵan aýqymdy is-sharaǵa elorda qyzý daıyndyq ústinde. Ásirese shahardyń ár bóliginde ásem bezendirilgen ulttyq naqyshqa toly dúnıeler kózdiń jaýyn alady. Sonyń biri – Beıbarys sultan kóshesiniń boıyndaǵy kópqabatty turǵyn úıdiń qabyrǵasyna salynǵan «Búrkitshi» atty jańa mural.
Muraldyń bıiktigi – 16 metr. Onda búrkittiń tomaǵasyn sypyryp, balaqbaýyn sheship, aspanǵa erkin qoıa bergen búrkitshiniń beınesi bederlengen. Bul kórinis kóshpeliler oıyndaryn bildiredi. Sýrettiń mazmunynda asqaraly taý, onyń etegindegi aq boz kıiz úıler, jaıqalǵan kók maısa, qysqasy, osy saıyn dalada erkin ómir súrip, óz dástúri men mádenıetin damytqan kóshpelilerdiń bekzattyǵy, tektiligi, er kóńildiligi shynaıy kórkemdelgen. Bir sózben aıtqanda, «Búrkitshi» beınesi adamǵa rýh beredi.
Aıta keteıik, Dúnıejúzilik kóshpeliler oıyny – etnıkalyq sport túrine arnalǵan halyqaralyq jarys. Oǵan kóshpeli ómir rýhyn kórsetetin Ortalyq Azııa etnostarynyń halyqtyq oıyndary kiredi. Bas shaharda ótetin úlken is-sharaǵa álemniń 89 elinen 2000-ǵa jýyq sportshy qatyspaq.