Áskerı teńizshiler Qonaev qalasynda nysandardy mınadan tazartty. Áskerı-teńiz kúshteri bólimsheleriniń oqytý sabaqtary Qapshaǵaı sý qoımasynyń jaǵalaý ýchaskesinde, 20030 áskerı bóliminiń aýmaǵynda ótti.
Baǵdarlama sý astyndaǵy kesý jáne dánekerleý, sý astyndaǵy detonasııalyq operasııalar men sý astyndaǵy nysandy izdep taýyp, mınadan tazartý boıynsha praktıkalyq áreketter men teorııalyq sabaqtardy qamtıdy. Sondaı-aq kótergish arqyly batyp ketken zattardy kóterdi. Praktıkalyq shyńdaý jaýyngerlerdiń sý astyndaǵy qaýipsizdigin nazarǵa ala otyryp ótkizildi.
– Ujym kásibı turǵydan daıyn. Quramanyń basty artyqshylyǵy – barlyq áskerı qyzmetshiler mindetterdiń mańyzyn bir kisideı túsinip, qajetti nátıjege jetý úshin birlese áreket etýi. Sýasty mınasyn tazartý, baǵdarlaý jáne izdeý, súńgýir-tehnıkalyq jumystary negizi qyzyqty, sonymen birge asa qatty jaýapkershilikti qajet etedi. Sondyqtan barlyq jeke qurammen sabaqtarda jazataıym oqıǵalardyń aldyn alý úshin qaýipsizdik sharalaryn saqtaý jónindegi talaptar suralady. Ár adam óz kúshi men is-áreketin dál esepteýdi, joǵary fızıkalyq daıyndyqty, senimdilikti, aınalasyndaǵylarǵa jáne alǵa qoıǵan maqsatqa degen adaldyqty talap etedi. Áskerı baýyrlastyqtyń kúsheıtilgen jaýyngerlik daıyndyǵy men senimdiligi bizge óz múmkindikterimizge senimdilik uıalatady. Onsyz eshteńe múmkin emes, – deıdi 29011 áskerı bóliminiń rota komandıri, kapıtan-leıtenant Jánibek Sálikbaev.
Mundaı is-sharalardy ótkizý Áskerı-teńiz kúshteriniń bólimshelerine sý astyndaǵy mınalardy tazartý, baǵdarlaý jáne izdeý, súńgýir-tehnıkalyq jumys boıynsha jaýyngerlik mashyqtan mol tájirıbe alýǵa, olarǵa júktelgen mindetterdi oryndaý úshin qajetti daǵdylardy sińirýge múmkindik beredi. Is-qımyl barysynda óz aýmaqtaryn mınadan tazartatyn basqa elderdiń tájirıbesi zerdelenip, kúndelikti praktıkalyq jumysta engizilip jatyr.