Keshe Májilis Tóraǵasy Qabıbolla Jaqypov pen Ortalyq Azııa elderimen yntymaqtastyq jónindegi Eýroparlament delegasııasynyń basshysy Iveta Grıgýle qazaqstandyq-eýropalyq ózara is-qımyldy nyǵaıtý máselelerin talqylady. Bul – Iveta Grıgýleniń jańa qyzmetinde Qazaqstanǵa alǵashqy kelýi, dep habarlady Májilistiń baspasóz qyzmeti.
Qabıbolla Jaqypov atalǵan baǵyt bizdiń elimizdiń strategııalyq basymdyqtarynyń biri ekenin alǵa tarta kelip, Qazaqstan Prezıdentiniń san qyrly saıasaty álemniń kóptegen elderimen yntymaqtastyq ornatýǵa aıqyn jol ashatynyn atap ótti.
Iveta Grıgýle Qazaqstannyń áleýmettik-ekonomıkalyq damý úderisine óte joǵary baǵa berdi. Onyń aıtýynsha, bizdiń elde árbir adamnyń, jalpy alǵanda, búkil qoǵamnyń ál-aýqatyn kóterýge aıryqsha kóńil bólingen. Búgingi kúni Eýroodaq – Qazaqstannyń barlyq saladaǵy iri áriptesiniń biri.
Mártebeli meımannyń atap ótkenindeı, adamdar arasynda senimdilik qarym-qatynasty ornatý men damytý óte mańyzdy, ol jalpy memleket tabysynyń jarqyn kepili.
Májilis Spıkeri óz kezeginde Elbasy saıasatynyń arqasynda jyl sanap nyǵaıyp kele jatqan qazaqstandyq qoǵamnyń toleranttylyq úlgisine kóńil bóldi.
Kezdesý barysynda Qazaqstan men Eýroodaq arasynda saýda-ekonomıkalyq yntymaqtastyqty nyǵaıtý, ınvestısııalyq tartymdylyq, tranzıttik-kóliktik áleýet, sondaı-aq, parlamentaralyq qarym-qatynas syndy aýqymdy máseleler áńgimege arqaý boldy.
Qabıbolla Jaqypov delegasııa múshelerine Májilis qyzmeti týraly, eldiń zańnamalyq bazasyn jetildirý jolynda atqarylyp jatqan jumystar jaıynda baıandap berdi.
Parlamentaralyq qarym-qatynasty tereńdetý qajettigin aıtqan Iveta Grıgýle Ortalyq Azııa elderimen yntymaqtastyq jónindegi delegasııamen baılanysty keńeıtý maqsatynda qazaqstandyq depýtattardy Eýroparlamentke shaqyrdy.