Shahtınsk qalasynda avtomobıl jolynyń boıyndaǵy orman beldeýi qoqystan tazartyldy, dep habarlaıdy Egemen.kz.
«Taza orman» dep atalǵan aksııaǵa eriktiler, sportshylar, «Jasyl el» jasaǵynyń jas sarbazdary qatysty.
Shahtınsk orman alqabynyń aýdany 722 gektardy quraıdy. Bul qala turǵyndarynyń demalýǵa jáne sportpen shuǵyldanýǵa arnalǵan súıikti orny. Degenmen, ózinen qalǵan qaldyqty tazalap júrý mádenıeti ekiniń birine buıyrmaǵany kóbimizdi qynjyltady.
Qala, oǵan jaqyn kent, aýyl jastarynyń bastamasymen ormanǵa aǵash egý, qoqys-qaldyqtan tazartý jumystary boıynsha aksııalar jıi ótedi.
«Orman – dala baılyǵy. Búgin jastarmen birge jalyndap júrip jap-jasyl aımaǵymyzdy tazarttyq. Aksııanyń negizgi maqsaty da sol. Sonymen qatar, ortanyń tabıǵatqa degen janashyrlyǵyn arttyrý», deıdi Shahtınsk qalasy Jastar resýrstyq ortalyǵy basshysynyń mindetin atqarýshy Alekseı Varzaev.
Shahtınsk qalasynda «Taza Qazaqstan» aksııasyna 100-den asa eńbek ujymy men 10 myńǵa jýyq turǵyn qatysty. 15 myń tonnadan asa qaldyq syrtqa shyǵarylyp, saıabaq, alań, eskertkishter aýmaǵy tazartyldy. Myńnan kóp kóshet egildi.