Orman – jerdiń dáýleti. Osy bir baılyqtyń túbin baltamen shapqyzbaı, qyzǵyshtaı qoryp kele jatqan ormanshylar áýleti bar. Týys-týǵanymen ábden mashyqtanǵan ormanshy mamandyǵyn Qarqaraly eline syı-qadiri bar Mahmut áýletiniń nemere-shóberelerine deıin oqyp alyp, eńbek etip júr. El osy bir urpaq sabaqtastyǵyna, eńbek estafetasyna erekshe súısinedi.
Mahmut áýletiniń orman sharýashylyǵyndaǵy eńbegi sonaý 1971 jyldan bastalady. Eńbek bastaýynyń eń ushynda turǵan bilikti ormanshy О́mirzaq Muqataıuly edi. Eń alǵash ol Qarqaralynyń orman sharýashylyǵyna ormanshy bolyp jumysqa ornalasady. Eki jyldan soń biliktigin bilgen sol kezdegi orman sharýashylyǵynyń basshylyǵy ony bas ormanshynyń kómekshisi retinde qyzmetin ósiredi. Bir jyl boıy bas ormanshynyń qasynda júrip, ormanǵa qatysty orasan jumysqa bastamashy bolady. Bir jyldan keıin tabıǵaty tamsantatyn Kimasar shatqalynda ormanshy bolyp aýysady. Qaýyrt sharýa, qarbalas tirshilikten qashpaıdy. Densaýlyǵyna baılanysty sondaı sheshim qabyldapty. Ol jerde on jyl eńbek etedi. Jıyrma jylǵy adal eńbegi elenip,«Eren eńbegi úshin» medali buıyrady. Esimi «Altyn kitapqa» jazyldy.
Áke bastaǵan izdi ul-qyzdary jalǵastyrady. Úlken uly Jánibek 1986 jyldan bastap Kimasar shatqalynda memlekettik ınspektor-ormanshy bolyp qyzmet atqaryp keledi. Ákesi ulyna bes jyl qatar jumys istegende bar bilgenin úıretip ketedi. Sonyń arqasynda shatqaldaǵy sharýany shyr aınaldyryp otyr. Qyryq jylǵa jýyq ýaqyt taban aýdarmaı Kimasarǵa keletin týrısterge ormannyń erejesin túsindirip, ondaǵy toǵaı men kóldi qyzǵyshtaı qorıdy. Taǵy bir uly Qanybek te – 2003 jyldan beri osy bir shatqalda ormanshy. Ol da áli osy bir úırengen jerinde. Kimasardyń saı-saıyn, ár tasyn, qaraǵaı-arshasyn, qybyrlaǵan jándigine deıin ábden jattap alǵan.
– О́z zamanynda qadirli ormanshy bolǵan ákemiz bala kezimizden beri osy bir mamandyqqa úıretti. Qyzdaryna deıin ormanshynyń oqýyn oqytty. Úıde bes ul, úsh qyz óstik. Barlyǵymyz demeıik, teń jartysy áke jolyn jalǵadyq. Kórip ósken sharýa bolǵan soń jattyq tanytpadyq. Kerisinshe, janymyzǵa jaqyn boldy. Qazir nemereleri de, jıenderi de osy saladamyz. Tabıǵatpen janymyz úndes. Onyń ústine qyzmetimizdi abyroıly atqarsaq, áýletimizben ákemizdiń amanatyna adal bolsaq degen oıymyz bar. Osy bir Qarqaralynyń ný ormanyn ákemizdiń amanatyndaı kóremiz, – deıdi Jánibek Mahmut.
Taǵy bir baýyry Qanatbek – 2004 jyldan bastap Qarqaraly ormanshylyǵynda ormanshy. Talǵat О́mirzaquly – 2005 jyldan bastap Qarqaraly memlekettik Ulttyq tabıǵı parkiniń taý ormanshylyǵynyń orman sheberi. Qaramaǵynda bes ınspektor bar. О́zderine tıesili aýmaqty órtten, zańsyz ań aýlap, aǵash kesetinderden saqtaıdy. Al Aıdarbek 2014-2016 jyldar aralyǵynda Qarqaralynyń tabıǵı parkiniń baqylaý ótkizý beketinde qyzmet istep, Qaraǵandyǵa qonys aýdardy. Qazir qalanyń Prıshahtınsk bóligindegi órt sóndirý bóliminde eńbek etip júr. Gúlnar О́mirzaqqyzy 2012-2016 jyldar aralyǵynda Ulttyq parkte radıooperator retinde jumys atqardy. Iаǵnı baılanys jelisine jaýapty maman boldy. Al Shynar О́mirzaqqyzy 2010-2017 jyldar aralyǵynda Qarqaraly Ulttyq tabıǵı parkinde Ǵylym jáne monıtorıng bóliminiń monıtorıng jónindegi bas mamany qyzmetin abyroımen atqardy. Nemeresi Shyńǵys Jánibekuly 2013 jyldan bastap orman sheberi bolyp eńbek jolyn bastaıdy. Keıin atasynyń izimen Qarqaraly ormanshylyǵynda bas ormanshysynyń kómekshisi bolyp kóteriledi. Qazir – osy jaýapty qyzmette.
– Ormanshy – memlekettiń orman qoryna jatatyn barlyq óskinniń jaqsy ósip, qorǵalýyna jaýap beretin adam. Aǵashty urlap kesýshilerden ǵana emes, órtten, sýdan, túrli ósimdik aýrýy men zııandy jándikten qorǵaý mindeti de bar. Jalpy aıtqanda, minsiz qyzmet atqarý kerek. О́mirzaq atamyzdyń burynǵy jolymen kele jatyrmyn. Ol kisi de bas ormanshynyń kómekshisi qyzmetin atqardy ǵoı. О́te jaýapty jumys. Ákem de bedeldi ormanshy. Maqtan tutamyn. Jaýapkershiliktiń de júgi aýyr, – deıdi ormanshy nemeresi Shyńǵys.
Taǵy bir nemeresi Álibek Qanybekuly – Qarqaraly ulttyq tabıǵı parkinde shtattan tys memlekettik ınspektor. Baqylaý ótkizý beketinde týrısterge orman erejesin tanystyrady. Jıen nemeresi Anar Oıratqyzy naǵashylarynyń jolyn qýyp, Qarqaraly ulttyq parkinde Ǵylym jáne monıtorıng bóliminiń aǵa mamany retinde jumys atqaryp júr.
Qarqaralydaǵy máýeli báıterekteı jaıqalǵan ormanshylar áýleti osyndaı tirshilik keship jatyr.
Qaraǵandy oblysy,
Qarqaraly aýdany