Elimizde 50 myńnan astam adamdy tarta otyryp, esirtki satý jónindegi 55 telegram-arnanyń zańsyz qyzmeti joıyldy. Olardyń jalpy aınalymy 48 mlrd teńgeni qurady, dep habarlaıdy Egemen.kz Qarjylyq monıtorıng agenttiginiń baspasóz qyzmetine silteme jasap.
Aıta keteıik, jyl basynan beri QMA materıaldary boıynsha eldiń quqyq qorǵaý organdarymen (UQK, BP, IIM, SJQIQA) esirtkiniń zańsyz aınalymyna baılanysty 60 qylmystyq is qozǵalyp, onyń jartysy kontrabanda faktileri boıynsha bolǵan. Onlaın narkoshoptarǵa qatysty taǵy 29 materıal boıynsha tekserý is-sharalary júrgizilip jatyr.
«Aınalymnan shamamen 100 kg aýyr esirtki – kokaın, ketamın, mefedron jáne marıhýana, sondaı-aq olardy jasaý úshin 1 tonnadan astam prekýrsorlar tárkilendi», delingen QMA habarlamasynda.
Sonymen qatar qylmystardyń áleýetti qatysýshylary bolyp tabylatyn 30 myńǵa jýyq «droptardyń» banktik kartalary buǵattalǵan. Sondaı-aq Shymkentte Qazaqstandaǵy eń iri mefedron óndirý jáne taratý arnasy toqtatylǵan. Esirtki laboratorııasy qurylyp, onda sıntetıkalyq esirtki óndirýge arnalǵan 1 tonnadan astam qyshqyl tárkilengen. Onyń óndiristik qýaty aı saıyn 50 myń doza esirtki óndirýge múmkindik beretini anyqtalǵan.
Bul rette halyqaralyq yntymaqtastyq aıasynda QMA analıtıkalyq málimetter negizinde TMD keńistiginde esirtki taratqan transulttyq ınternet-dúkenderdi joıý boıynsha Qazaqstan, Belarýs jáne Reseı qarjy barlaýshylarynyń qatysýymen arnaıy operasııa júrgizilgen.
«Úsh eldiń aýmaǵynda úsh aýqymdy esirtki dúkeni jabyldy, 35 narkodıler ustaldy, 1 tonnadan astam psıhotroptyq zattar jáne klıentterge satýǵa daıyn 3,5 myń dozaǵa jýyq sıntetıkalyq esirtki tárkilendi», delingen habarlamada.
Halyqaralyq «esirtki satýshylardyń» jalpy tabysy shamamen 30 mıllıon AQSh dollaryn quraǵan, onyń 12 mıllıony krıptovalıýtada shyǵarylǵan. QMA bastamasy boıynsha Ulttyq Banktiń jáne QNRDA qaýlylaryna ózgerister engizilip, bir klıentke birneshe bank kartasyn shyǵarý boıynsha shekteýler belgilendi jáne onlaın rejımde olardyń monıtorıngi qamtamasyz etilgen.
Sonymen qatar rezıdent emes jáne kámeletke tolmaǵandarǵa tólem kartochkalaryn berý kezinde qosymsha baqylaý jáne shekteý sharalary belgilendi. Al, jańa klıentti tirkeý kezinde mindetti bıometrııalyq sáıkestendirýdi júrgize otyryp, tólem kartalaryn shyǵarý boıynsha bankterdiń ishki baqylaý sharalary kúsheıtilgen.
Aıta keteıik, esirtkiniń taralý belgileri men krıterııleri barlyq bankterge jiberilgen. Bul esirtki saýdasynyń faktilerin odan ári anyqtaýǵa múmkindik beredi. Atalǵan normalardyń qoldanylý merziminen bastap birneshe karta ustaýshylar sany 9,5 myńnan 3,6 myń klıentke deıin qysqaryp, 1,5 myń klıentke qashyqtan qyzmet kórsetý qoljetimsiz bolǵany belgili boldy.