Qazaqstan — ıadrolyq otyn shyǵaratyn az elderdiń biri. Otyndy otandyq birinshi AES salýǵa qoldaný josparlanyp otyr. Bul týraly «Qazaqstandyq atom elektr stansalary» AQ dırektory Tımýr Jantıkın Qazaqstanda AES salý máseleleri boıynsha búgin Astanada ótip jatqan jarııa talqylaý barysynda málimdedi.
«2018 jyly atom stansasyn salýdyń tehnıkalyq-ekonomıkalyq negizdemesiniń birinshi bólimin ázirledik, onda eki óńirde stansa salý múmkindikteri qarastyrylǵan. Atap aıtqanda, bul óńirler - Kýrchatov, ShQO, qazir ol Abaı oblysy, ekinshisi Ońtústik Qazaqstan oblysy, Balqash mańyndaǵy Úlken aýyly, bul Almaty oblysy. AEHA usynymdary boıynsha keń aýqymdy zertteý júrgizildi, atap aıtqanda, qaýipsizdik, qýatty ıadrolyq nysandardy ornalastyrý sharttary boıynsha jáne Qazaqstan Respýblıkasynda qoldanylatyn normatıvter negizinde júrgizildi. Eki aýdan da jaramdy dep tanyldy», dedi Tımýr Jantıkın.
Ol sonymen qatar Qazaqstannyń energııa júıesin boljaýǵa taldaý júrgizilgenin de aıtty. Sonyń negizinde ońtústik jaqta elektr energııasy tapshylyǵy 2,7 gıgavattqa deıin jetetini anyqtaldy.
«Ońtústik Qazaqstan – elektr energııasyn tutyný ortalyǵy. Ońtústik negizgi generasııa bolyp sanalatyn Soltústikte shyǵarylatyn energııany tutynady, ıaǵnı, bul ıadrolyq kózdi ornalastyrýdyń ońtaıly orny. 2019 jyly biz marketıngtik prosedýralardy júrgizdik, jetekshi satýshylardan tehnıkalyq jáne kommersııalyq usynystar suradyq, bizge 13 joba usynysy berildi. Energetıka mınıstrligimen birge krıterııler júıesi ázirlendi, ol boıynsha biz Qazaqstanda qurylys úshin eń perspektıvaly 4 jobany tańdadyq. Bul - Qytaı, Koreıa, Reseı jáne Fransýz kompanııalary. 2022 jyly osy tórt jobalyq usynys úshin derekterdi ózektendirý júrgizildi. Fransýz Konsaltıngtik kompanııasymen birge baǵalaý krıterııleriniń júıesi jetildirildi. Qazirgi ýaqytta osy jobalyq usynystardy egjeı - tegjeıli zerdeleý jumystary júrgizilip jatyr», dedi Jantıkın.
Onyń aıtýynsha, marketıng bóliminiń materıaldary japondyq atom elektr kompanııasy júrgizgen halyqaralyq saraptamadan ótken.
«Ol bizdiń barlyq nátıjelerimizdi, zertteý ádistemelerimizdi rastady jáne bizdiń usynysymyzben kelisip otyr. Birinshi stansııa Balqashtaǵy Úlken aýylynyń aýdanynda salynýy kerek. AES qurylysy kezinde 8000 jumys orny jáne paıdalanýǵa berilgennen keıin 2000 jumys orny qurylady», dep atap ótti Jantıkın.