Memleket basshysynyń sý tasqynynan zardap shekken turǵyndarǵa tıisti kómek kórsetý jónindegi tapsyrmasyn oryndaý jumysy qarqyndy júrip jatyr. Kóktemgi sý tasqyny saldarynan baspanasy jaramsyz dep tanylǵan Batys Qazaqstan oblysy Terekti aýdany Podstıopnoe aýylynyń 50 turǵyny baspanaly boldy. Jańa úıler demeýshiler qarjysyna salyndy, dep habarlaıdy Egemen.kz
Turǵyn úılerdiń kiltterin tabystaý rásimine Batys Qazaqstan oblysynyń ákimi Narıman Tóreǵalıev qatysyp, qonys ıelerin quttyqtady. Oblys ákiminiń aıtýynsha, Terekti aýdanynda salynyp jatqan 130 úıdiń 50-niń qurylysy aıaqtalǵan. Qalǵan 80 úıdiń qurylysy qyrkúıek aıyna deıin aıaqtalady dep josparlanǵan. Budan bólek, sý tasqynynan zardap shekken turǵyndar úshin BQO-nyń Terekti aýdanynda 30 úı satyp alynyp, 395 otbasynyń baspanasyna jóndeý jumystary júrgizilgen.
Terekti aýdany Podstepnoe aýylynyń turǵyny Laýra Nysanovanyń úıi sý tasqyny kezinde jaramsyz dep tanylǵan.
«Naýryz aıynyń sońynda úıimizdi sý basty. Bir qıyndyqtyń artynda jeńildik turady degen shyn sóz eken. Búgin baspanaly bolyp otyrmyz. Jaryq, keń 3 bólmeli, úlken, barlyq jaǵdaıy jasalǵan úıge qol jetkizgenimizge óte qýanyshtymyz. Osyndaı jaǵdaı jasaǵan Memleket basshysyna alǵysymdy bildiremin», - dedi Laýra Nysanova.
QR О́nerkásip jáne qurylys mınıstrligi Ahýaldyq ortalyǵynyń málimetinshe, Batys Qazaqstan oblysynda 775 úıdiń qurylysy júrgizilip jatyr, turǵyn úı satyp alý jáne jóndeý jumystary jalǵasyn tapty. Búgingi tańda zardap shekkenderge 130 jeke turǵyn úı salynyp, 1128 úı satyp alynǵan. Al qalǵan 1321 úıde jóndeý jumystary aıaqtalǵany belgili boldy.