Jambyl oblysynyń prokýratýrasy 2,2 mlrd teńge somasyna memlekettik satyp alý konkýrstarynyń kúshin joıdy, dep habarlaıdy Egemen.kz.
Prokýratýranyń baspasóz qyzmeti habarlaǵandaı, reıtıngtik-balldyq júıeni paıdalana otyryp, konkýrs arqyly memlekettik satyp alýdy taldaý aıasynda málimetterdi burmalaý faktisi anyqtalǵan.
Qatysýshylardyń biri óz biliktiligi týraly durys emes málimet bergen. Sonymen qatar ol buryn oryndalǵan obektiler týraly aqparatty burmalaıtyn qujattardy veb-portaldyń elektrondyq depozıtarııine engizip, nátıjesinde jumys tájirıbesin arttyrǵan.
«Bul josyqsyz qatysýshyny quny 2,2 mlrd teńge bolatyn sýmen jabdyqtaý obektilerin salýǵa arnalǵan konkýrstyń jeńimpazy dep tanýǵa negiz boldy. Prokýrorlyq qadaǵalaý aktisiniń negizinde oblys ákimdigi merdigerdi memlekettik satyp alýǵa josyqsyz qatysýshy jáne konkýrstardyń qorytyndylaryn jaramsyz dep taný týraly MAES-ke talap qoıý engizdi», delingen habarlamada.
Tamyzdyń 7-si kúni talap qoıý tolyǵymen qanaǵattandyrylǵan.