Búgingi Úkimet otyrysynda Premer-mınıstrdiń orynbasary Tamara Dúısenova memleket basshysynyń Joldaýyn júzege asyrý barysynda bilim salasynda atqarylatyn jumystardy baıandady, dep jazady Egemen.kz.
Tamara Dúısenova baıandamasynda elimizde fılıaldaryn ashqan sheteldik joǵary oqý oryndaryna biryńǵaı talap qoıylatynyn málimdedi. Mundaı talapqa oqý baǵdarlamalarynyń halyqaralyq standarttaryn, oqytý tehnologııasyn jáne stýdentterdiń bilimi men biliktiligin baǵalaý mehanızmderin transferleý sharalary engiziledi. Mundaı sharttar qazan aıynyń sońyna deıin ázirlenedi.
JOO-lardyń bilim berý salasyndaǵy básekege qabilettiligin kúsheıtý maqsatynda keler jyldyń 1 sáýirine deıin joǵary oqý oryndarynyń bilim sapasyn táýelsiz baǵalaý uıymdastyrylady.
Premer-mınıstrdiń orynbasary bilim berý granttaryna qatysty ózgerister bolatynyn qosa jetkizdi.
«Aldaǵy jyldarda granttar joǵary oqý oryndarynyń kiretin lıgasyna qaraı jáne ulttyq biryńǵaı testileýde joǵary ball alǵan, biraq konkýrs aıasynda óte almaı qalǵan túlekterdi qoldaý maqsatynda saralanatyn nemese dıfferensıalanatyn bolady. Sonymen qatar osy ózgerister aıasynda joǵary oqý oryndaryna túsýge múmkindik beretin shekti baldar da qaıta qarastyrylady», dep túsindirdi Tamara Dúısenova.