Sanany sóz oıata ma, is oıata ma? Ekeýi de durys oryndalǵanymen, selt etkize almaýy múmkin ǵoı. Oǵan bola «mynaýyń daýasyz eken» dep qoıa salamyz ba? Qaıtken kúnde bir qısyny tabylýǵa tıis qoı.
Áńgimeniń ashyǵyn aıtaıyq, bizdiń aýylda Qopargúl degen qyz boldy. Synyptastarynyń qoıǵan aty ǵoı, negizi, esimi áp-áıbat. О́zi de súıkimdi qyz edi. Ony kim Qopargúl atandyryp jibergenin bilmeımin. Qýshykesh bireý baıqaýsyzda solaı dep qalsa kerek, keıin bul aty umytylyp ketti, alaıda meniń esimde qalyp qoıdy. Sol Qopargúldiń atasy qalypqa syımaıtyn jan desetin. Aqsaqaldyń ózin kórgem joq, biraq úlkenderden estigen bir áńgimesin bilem. Netken áńgime deseńizshi?
Álgi shaldyń aldyna bettep eshkim kele bermeıtin kórinedi. Syrtty bilmeımin, aýyl ishinde solaı eken. Biraq qazaq balasy qashan úlkenniń jolyn kesip, jaǵasynan alǵandaı. Sodan bir kúni osy aqsaqalymyzdy kórshi kóshedegi turǵylasy qonaqqa shaqyrypty. Daıyndalyp, aýyldyń sorpa betine shyǵar jaqsylaryn qonaq qylsa kerek úı ıesi. Álde aýyl ishiniń úırenshikti «omyrtqa», «shekesiniń» biri me, áıteýir «Aıtekeńdiki shaqyrypty» deıdi, boldy, basqa áńgime joq edi ǵoı úlkenderde.
Álgi birbetkeı aqsaqalymyz shaqyrǵan Aıtekeńdikine barsa, bir shal qydyńdap tıisip qoımaıtyn kórinedi. O shetinen bir, bu shetinen eki shyǵyp, mazasyn alǵan. «Qyzyp» alǵan bolsa kerek. Dastarqan basynda da bir-eki ret sózben súıkep ótse de, birbetkeı aqsaqalymyz úndemeı etin jep, sorpasyn soraptap otyra beripti. Et pen sorpadan soń belgili, sál áńgime-dúken, sosyn shaı dastarqan bar. Ol eki aralyqta da álgi áýmeser baıaǵy «áýenine» bassa da, bizdiń shal úndemeı shydapty. Sosyn el ketken soń, úı ıesi Aıtekeńdi shaqyrypty. Qasyna otyrýǵa endi yńǵaılana bergende, «shaqyrǵandaǵy maqsatyń anany ishtirip, meni sabatý boldy ǵoı, jazań – osy», dep qamshymen basqa bir salyp, shyǵyp ketipti. Úı ıesi basy salbyraǵan kúıi qalypty ornynda. Qarsylyq bildirip, lám-mım demegen. Jastaý kezimde osy áńgimeni túsine almaı, ishteı birbetkeı, qyńyr shaldy kinálaıtynmyn. Úı ıesin emes, qoly qyshysa, mazasyn alǵan qyzý shaldy nege sabamaǵan dep. Sóıtsem, máni basqada sııaqty. Úıińe shaqyryp, arnaıy qonaq qylǵan ekensiń, jaýapkershilik moınyńda. Teli-tentekti qurmettep, basqalardyń basyna shyǵaryp qoıǵany – úı ıesiniń kinási. Qamshy tıgende, qarsylaspaǵan ol da qasıetsiz bolmaı tur. Aqsaqaldardyń árbir áreketinde osyndaı mán jatatyn. Baǵamdaı alsaq, árıne.