Jaqynda oblys ortalyǵynda qazaq poezııasynyń kórnekti ókili Dýlat Babataıulynyń esimin ıelengen Semeı joǵary kolledjinde bilim kúnine arnalǵan is-shara ótti. Oǵan bilim men ǵylym salasynyń ókilderi, stýdentter jáne ata-analar qatysty.
Semeı joǵary kolledji – 26 jyldan beri óńirde ǵana emes, elimizdiń túkpir-túkpirinde ártúrli salada eńbek etip júrgen bilikti mamandardy túletip ushyrǵan oqý oryndarynyń biri. 1998 jyly aımaqtaǵy alǵashqy jekemenshik bolyp irgetasyn qalaǵan kolledj jańa oqý jylyn biregeı izdenistermen bastap otyr.
Mádenı is-shara barysynda el aqsaqaldary Arap Espenbetov, Zeınolla Toqaev, basqa da zııaly qaýym ókilderi áıgili aqyn atyndaǵy bilim ujymyna izgi lebizderin arnap, batasyn berdi.
Sońǵy jyldary kásibı-tehnıkalyq mamandyqtarǵa degen suranys artyp otyr. Bir jaǵynan, bul Memleket basshysynyń tikeleı tapsyrmasyna sáıkes elimizdegi kásiporyndarǵa kórsetilip jatqan qoldaý dep bilemiz. Bıyl atalǵan kolledjde jumysshy mamandyǵyna 300-ge jýyq grant bólingen.
«Bul ótken jyldardaǵy kórsetkishtermen salystyrǵanda anaǵurlym kóp. Prezıdenttiń bıylǵy Joldaýynda da jumysshy mamandyǵyna erekshe mańyz berildi. Buǵan biz qatty qýandyq. Qazir qoǵamdaǵy suranysqa ıe mamandyqtardy ıgerýge stýdentterge barynsha jaǵdaı jasalǵan. Osy jyldan bastap kolledj stýdentteriniń shákirtaqysy da ósti. Bul – jumysshy mamandyǵynda oqıtyn jastarǵa kórsetilip otyrǵan úlken qoldaý. Qazir biz teorııa men tájirıbeni ushtastyrý úshin jergilikti kásiporyndarmen kelissóz júrgizip, mamandardy birge daıarlaýdy josparlap otyrmyz», dedi kolledj dırektory Ǵafý Boranbaev.
Abaı oblysy