Keleshegi kemel kombınat

Indýstrııalandyrý is ústinde

Qurylys pen ındýstrııa uǵym­dary, bul eki salanyń arasy bir-birinen qashyq ketpeıdi. Ári birin biri únemi tolyqtyryp, baıytyp otyrady. Búgingi óndiristik qarym-qatynystarda qurylys ındýstrııasy degen de uǵym bar. Bul qurylysqa qajetti ónimder men materıaldar óndirisi degen sóz. Oral qalasynda ótken jyldyń aıaǵynda iske qosylǵan úı qurylysy kombınaty týraly áńgime qozǵalǵan kezde de qurylys pen ındýstrııanyń birligi men úndestigin aınalyp óte almaımyz. Búgingi kúni tereńirek oı jú­gir­tip kórseńiz tutastaı elimiz beı­ne bir alyp qurylys pen ındýs­trııa alańyna aınalyp ketkendeı kúı keshesiz. Qazirgi ýaqytta bul ekeýi­­niń de qarqyny jaqsy eke­nine esh­kim kúmán keltire almaıdy. Al osy qarqyndy budan ári taǵy da eki-úsh ese kóterý úshin ne is­tegen jón? Ba­tys qaqpanyń óndiris­tik qýa­tyn­ arttyrýǵa úles qosa bas­taǵan «Bo­la­shaq – T» JShS-ine qaras­ty úı qury­­lysy kombınaty osy saýal­ǵa jaýap bere alatyndaı jarqyn mysal. Bul biregeı nysan «Bıznestiń jol kartasy-2020» baǵdarlamasy aıasynda turǵyzylǵan. Jańa óndi­ristik qurylym ıeleri turǵyn úı­ler­men qatar áleýmettik-tur­mys­­tyq sala sheńberindegi qury­lys­­tarǵa da óz qoltańbalaryn qal­dy­rýdy kózdep otyr. Mundaǵy qu­ral-jabdyq­tar men qondyrǵylar Ger­manııa men Fınlıandııadan jáne Ita­lııadan jetkizilgen. Osy arqy­ly kom­bınattyń bilikti maman­dary zamanaýı tehnologııamen ju­mys isteýge qol jetkize aldy. Mun­daǵy jumys úderisi túgeldeı avto­mattandyrylǵan. Mine, qurylys qarqynyn kóterýge qajetti taǵy bir faktordy dál osy tustan kóremiz. Júz ret estigennen, bir ret kór­gen artyq degendeı, biz osy ón­diristik úderisti kórýge yqyla­sy­myz bar ekenin joǵaryda atalǵan qurylys kompanııasynyń bas dı­rektory Q.Qoshanovqa aıtqan kezimizde ol bul usynysymyzdy birden qabyl aldy. Ári kóp keshikpeı bizdi óz kóligimen jańa kombınatqa alyp baryp kórsetti. Atalǵan úderistiń kórinisi kelisti-aq. Eńsesi bıik ǵımarattyń joǵary bóliginde ornatylǵan qurylǵy, ıaǵnı avtomatty júıe arqyly shartty túrde alǵanda tómendegi alyp ydysqa eritindi quıylyp túsedi. Sodan keıin bul quıma jazylyp tegisteledi. Úı qurylysyna qajetti temir-beton qabyrǵalardyń tuńǵysh qańqasy osylaı jasalady eken. Ádette, qurylys salý kezinde onyń qabyrǵasyn turǵyzý uzaq ýaqyt alatyny belgili. Al qa­­­byr­ǵalyq materıal temir-beton­nan turǵyzylǵan jaǵdaıda bul ýaqyt ájeptáýir qysqaratynyna da dál osy arada aıqyn kóz jetkizdik. – Bizdiń qazirgi úı qurylysy kombınaty ónimine uqsas qabyr­ǵalyq materıal buryn da kóp qoldanylǵan. Alaıda, qazirgi qury­lys ındýstrııasy óniminiń olardan ájeptáýir aıyrmashylyǵy men artyqshylyǵy bar. Onyń arasyna jylý ustaıtyn materıaldar sa­lynǵan. Sondaı-aq, jazdyń ystyq kúnderinde temir-beton salqyn aýany da ustap qala alady, – deıdi fırma basshysy Qaıdar Jasenuly. Elimizdiń batys qaqpasy – Oral qalasynyń bas damý jos­paryna sáıkes úı qurylysy kombınatynyń qyzmetin tıimdi túrde paıdalanýdyń ózge tetikteri de qarastyrylǵan. Bul jóninde bir oraıy kelgen sátinde BAQ ókilderine Batys Qazaqstan obly­synyń ákimi Nurlan Noǵaev áń­gi­melep bergen edi. Munyń jaı-japsary tómendegideı. Búginde oblys ortalyǵynda­ǵy apatty jaǵdaıdaǵy úılerdi to­lyqtaı joıý jónindegi máse­le jergilikti atqarýshy organ jetek­shileriniń nazarynda tur. Mysa­ly, qazirgi kezde Oral qalasynda osyndaı sanattaǵy otyz úsh úı bar. Munda 350 adam turady. Sol turǵyndardyń úı jaǵdaılaryn jaqsartý úshin jergilikti memle­kettik organdar «SV plıýs» jáne «Bolashaq-T» qurylys kompanııalarymen kelisim jasaýdy uıǵarǵan. Eger bul is oıdaǵydaı sheshilse, atalǵan fırmalar apatty úıdegi turǵyndarǵa arnap óz qarajaty esebinen baspana turǵyzbaq. О́z kezeginde ákimdik ınstıtýt ókil­derine turǵyn úı qurylysy úshin tıisti jer telimderin bólip, ınje­nerlik-kommýnıkasııalyq júıeler jóninen kómek kórsetpek. Bul eki jaqqa da paıdaly. Sóz joq, mundaı jaýapty isti búginde qoldanyspen dástúrge batyl ene bastaǵan memlekettik jeke menshik áriptestik arqyly oıdaǵydaı júzege asyrýǵa bolatyny kámil. Túıip aıtqanda, jańa jyldyń alǵashqy kúnderinen bastap úı qurylysy kombınaty ujymy alda turǵan aýqymdy eńserýge bet burdy. Olardyń basty maqsaty «Qoljetimdi baspana-2020» mem­lekettik baǵdarlamasyn júzege asyrýǵa úles qosý bolyp otyr. Sonymen birge, kombınat basshy­lyǵy men mamandary kommersııa­lyq sıpattaǵy turǵyn úıler qu­ry­lysyn júrgizýdiń utymdy joldaryn oılastyrý ústinde. Temir QUSAIYN, «Egemen Qazaqstan». ORAL. Sýretterde: jańadan ashyl­ǵan úı qurylysy kombınatynan kórinister. Sýretterdi túsirgen Rafhat HALELOV.