Jyl basynan beri múgedektigi jáne asyraýshysynan aıyrylý jaǵdaıy boıynsha memlekettik áleýmettik járdemaqylardy tóleýge respýblıkalyq bıýdjetten 408,1 mlrd teńge jumsalǵan. Buǵan qosymsha Memlekettik áleýmettik saqtandyrý qorynan eńbekke qabilettiliginen jáne asyraýshysynan aıyrylý boıynsha shamamen 53,4 mlrd teńge somasyna áleýmettik tólemder júzege asyrylǵan, dep habarlaıdy Egemen.kz.
Eńbek jáne halyqty áleýmettik qorǵaý mınıstrliginiń málimetinshe, 2024 jylǵy 1 qyrkúıektegi jaǵdaı boıynsha múgedektigine baılanysty MÁJ alýshylar sany shamamen 541,2 myń adamdy, asyraýshysynan aıyrylý jaǵdaıyndaǵylar 185,7 myń adamdy quraǵan.
Eske sala keteıik, múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómengi kúnkóris deńgeıiniń shamasyna baılanysty bolady. Al, asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty. Budan bólek, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-ten áleýmettik tólemder júzege asyrylady.
2024 jylǵy 1 qyrkúıektegi jaǵdaı boıynsha 97,5 myń adam eńbek etý qabiletinen aıyrylýyna baılanysty áleýmettik tólem, al 64,7 myńǵa jýyq otbasy asyraýshysynan aıyrylýyna oraı áleýmettik tólem alǵan.
Aıta keteıik, tólemderdiń mólsheri sońǵy 2 jyldaǵy MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffısıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrýǵa tikeleı baılanysty. Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady.
«2024 jylǵy 1 qańtardan bastap múgedektigi jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri eń tómen kúnkóris deńgeıiniń ulǵaıýy nátıjesinde 7% - ǵa ósti. QR Úkimetiniń sheshimimen eńbekke qabilettiliginen aıyrylý jáne asyraýshysynan aıyrylýyna baılanysty MÁSQ-ten tólenetin tólemderdiń mólsheri de 7% - ǵa artty. Mysaly, 2024 jylǵy 1 qańtardan bastap jalpy aýrýdan múgedektigi boıynsha MÁJ mólsheri I-top úshin – 95 496 teńgeni, II-top úshin – 76 397 teńgeni, III-top úshin 52 089 teńgeni quraıdy. 2024 jylǵy 1 qyrkúıektegi jaǵdaı boıynsha eńbekke qabilettiliginen aıyrylǵandarǵa tólenetin áleýmettik tólemderdiń ortasha mólsheri 58 257 teńgeni, asyraýshysynan aıyrylǵandarǵa – 61 939 teńgeni quraıdy», delingen vedomstvo habarlamasynda.