Keıingi 7 aıda Jetisý oblysyna 188,2 mlrd teńge tartylǵan. Jeke ınvestısııa mólsheri 136,7 mlrd teńgege jetken. Jaqynda QHR SÝAR Halyq úkimeti tóraǵasynyń orynbasary Sýn Hýnmeı bastaǵan Shyńjań-Uıǵyr avtonomııalyq aýdanynyń delegasııasy kelip, ınvestor bolýǵa nıet bildirip ketti.
Iske asyrylyp jatqan keleshegi zor joba qatarynda Kerbulaq aýdanyndaǵy metallýrgııa kombınaty, «Qorǵas – Shyǵys qaqpasy» arnaıy ekonomıkalyq aımaǵyndaǵy (AEA) «Qazaqstan-Qytaı halyqaralyq ónerkásip qalasy» ındýstrıaldy parki, Jońǵar qaqpasy aýmaǵyndaǵy qýaty 1 GVt bolatyn jel elektr stansasy sııaqty iri jobalar bar.
Birinshi jartyjyldyq qorytyndysy boıynsha, Jetisý oblysy men QHR arasyndaǵy taýar aınalymy 1,2 mlrd dollardy quraǵan. Oblystyń syrtqy taýar aınalymyndaǵy kórshi eldiń úlesi 80%-dan asady.
«О́ńirdiń tranzıttik áleýeti – áriptestik qatynastarymyzdyń bolashaǵy zor baǵytynyń biri. Qytaımen shekarada bes keden beketi ornalasqan elimizdegi birden bir óńirmiz. Bizde ekonomıkalyq eki ósý núktesi bar – bul Dostyq jáne Qorǵas baǵyttary», deıdi oblys ákimi B.Isabaev.
Dostyq baǵytyn damytý maqsatynda Almaty qalasynan «Dostyq» stansasyna deıingi avtomobıl jolyna jańartý júrgizildi. Sondaı-aq bıyl osy stansada «Alakól» avtomobıl ótkizý pýnktin keńeıtý aıaqtalady. Sonyń nátıjesinde, jolaqtar sany qosylyp, ótkizý qabileti táýligine 200-den 1 600-ge deıin artady. «Dostyq-Moıynty» temirjol jelisiniń ekinshi tarmaǵynyń qurylysy júrip jatyr, bul «Dostyq» stansasynyń ótkizý qabiletin birneshe ese arttyrýǵa múmkindik beredi.
О́z kezeginde Sýn Hýnmeı Jetisýǵa kelgen ekinshi sapary ekenin atap ótip, SÝAR men Jetisý oblysy arasyndaǵy yntymaqtastyqty odan ári keńeıtýdiń negizgi baǵyttaryna toqtaldy. Bul oraıda ol «Nur joly» avtomobıl ótkizý pýnktiniń ınfraqurylymyn damytý máseleleri týraly sóz qozǵady.
О́ńirde shekara mańyndaǵy avtomobıl jáne temirjol ótkizý pýnktteriniń tıimdi jumysy úshin tıisti sharalar qabyldanyp jatqanyn atap ótken Beıbit Isabaev birlesken fıto-veterınarlyq zerthana qurýdyń mańyzdylyǵyn eske saldy. Mundaı zerthana óńirdiń aýyl sharýashylyǵy ónimderin eksporttaý rásimderin jeńildetýge múmkindik beredi.
Taraptar shekara mańy pýnktteriniń ótkizý qabiletin arttyrý men ınfraqurylymyn jaqsartý, «jasyl» energetıka, týrıstik jáne mádenı-gýmanıtarlyq baǵyttar salasyndaǵy ekijaqty baılanystardy damytý, sondaı-aq atalǵan salalarǵa ınvestısııa tartý, saýda-ekonomıkalyq yntymaqtastyqtyń keń aýqymdy máselelerin talqylady. Kezdesý sońynda qatysýshylar «Qorǵas» HShYO qyzmetin úılestirýdiń birlesken tetikterin qurý jóninde qarasha aıynda birinshi otyrysty ótkizýge ýaǵdalasty.
Jetisý oblysy