Ulytaý oblysyndaǵy Keńgir sý qoımasy memleket menshigine qaıtarylady. Bul týraly oblys turǵyndarymen kezdesý barysynda Sý resýrstary jáne ırrıgasııa mınıstri Nurjan Nurjigitov málimdedi, dep habarlaıdy Egemen.kz.
Ulytaý oblysyndaǵy eń iri sý qoımasynyń jalpy kólemi 319 mıllıon tekshe metrdi quraıdy.
Mınıstrdiń aıtýynsha, sý qoımasyn memleketke qaıtarý prosesi aıaqtalýǵa jaqyn. Nysan osy jyldyń sońyna deıin Sý resýrstary jáne ırrıgasııa mınıstrliginiń «Qazsýshar» respýblıkalyq kásipornynyń balansyna kóshýi tıis.
«Keńgir sý qoımasy - aımaqtaǵy negizgi sý kózi. Jergilikti turǵyndar sýdyń sapasyna, onyń tıimsiz paıdalanylýyna jáne ekologııalyq máselelerge alańdaýshylyq bildirip otyr. Nysandaǵy gıdrotehnıkalyq qurylystar apatty jaǵdaıda. Sý qoımasyn memleket menshigine qaıtarǵannan keıin biz qordalanǵan máselelerdi sheshý úshin eń aldymen kóp faktorly zertteý júrgizemiz», dedi mınıstr Nurjan Nurjigitov.Sondaı-aq Ulytaý oblysynyń turǵyndary mınıstrge óńirdi sapaly aýyzsýmen qamtamasyz etý, jerasty sý qubyrlaryn jóndeý jáne jergilikti sý aıdyndarynyń ekologııalyq jaǵdaıy jóninde suraqtaryn qoıdy.