«Ol shyn máninde ustazdardyń ustazy boldy» deıdi Rafıqa Bekenqyzyn tanıtyndardyń bári. Bulaı dep aıtýǵa sebep te joq emes.
60 jylǵa jýyq ómirin oqytý isine arnaǵan ustazdyń ondaǵan myń shákirti bar. Ol – 350-den asa ǵylymı, oqý-ádistemelik eńbektiń avtory. Onyń ishindegi 15 kitap pen oqýlyq orta mektepke arnalǵan. Almatynyń qaq ortasynda birden-bir №12 qazaq mektebinde de qyzmet etti. Reformator-ustaz – otandyq pedagogıkanyń negizin salýshy, Sosıalıstik Eńbek Eri, Respýblıkanyń eńbek sińirgen muǵalimi. Artyna óshpes iz qaldyrǵan bilikti pedagogtiń eńbegi ushan-teńiz.
Jarty ǵasyr buryn qashyqtan oqytqan
Sum soǵys Qumash Nurǵalıevtiń eki aıaǵy men bir qolyn julyp alsa da, ómirge degen qushtarlyǵyna syzat túsire alǵan joq. Ol «Biz balalardy baqyt úshin ósiremiz!» degen uranmen ómir súrdi, eńbek etti. Sonaý 70-jyldardyń ózinde-aq Shyǵys Qazaqstannyń túkpirindegi Boran aýylynyń mektebin tolyq kompıýterlendirip, spýtnıktik júıede «qashyqtan oqytý» ıdeıasyn júzege asyrdy. Osy mektepti 31 jyl boıy basqaryp, oqý oshaǵyn aýyldyń mádenı ortalyǵyna da aınaldyrdy. «QazKSR Halyqqa bilim berý isiniń úzdigi» ataǵyna da ıe boldy. Al oqý-tárbıe úderisin tehnologııalandyrýdyń ekinshi kezeńine ótý maqsatynda osy televızııa-tehnıka ortalyǵyn qurdy. Osylaısha, barlyq pánge qajetti dıdaktıkalyq materıaldardy, 40 mektep kabınetin teleekrannan kórsetti.
Qıyn mekteptiń qajyrly dırektory
Arhımed Ysqaqtyń oqýshylarǵa úıretetin basty aqyly – «bireý ózińe qastandyq jasaǵanyn qalamasań, óz-gege de sony isteme». Dál osy ustanymmen ol shartty túrde sottalyp shyqqan, minezi qıyn jasóspirimderge arnalǵan eksperımenttik mektepti basqardy.
35 jasynda dırektor bolǵan ol sottalǵan jasóspirimderge arnap alǵash aqyly mektep ashty. Al sol mektepte basty sabaq – eńbek edi. «Bizdiń mektepte 1988–1993 jyldar aralyǵynda oqyǵan 1500 balanyń 1200-i shartty túrde sottalǵandar bolatyn. Mine, sol myń eki júzdiń ekeýi ǵana qaıtadan túrmege tústi», deıdi ar-daqty ustaz. Qazir Arhımedtiń mektebinde kádimgi balalar oqıdy. Bul da jaqsylyq shyǵar.