«Damý» qory bıyl óńirde 790 jobaǵa sýbsıdııa berý týraly kelisim jasady. Jalpy nesıe quny 31 mlrd teńgeni eńserdi. Oblysta 2010 jyldan byltyrǵa deıin memlekettik qoldaý alǵan kásipkerler 11,3 myń jańa jumys ornyn ashqan.
«Olar bıýdjetke salyq túrinde 552 mlrd teńge tóledi. «Damý» qory shaǵyn jáne orta bıznesti qoldaý úshin birqatar baǵdarlamany, onyń ishinde oblys ákimdigimen birlesip, «Kásipker» aýmaqtyq baǵdarlamasyn belsendi iske asyryp jatyr», deıdi qordyń aımaqtaǵy fılıalynyń dırektory Áset Tilemisov.
Jeke kásipker Nıkıta Dorosh birneshe jyl buryn «Neyshes Boots» brendimen aıaqkıim shyǵaratyn kásiporyn ashqan. «Damýdan» alǵan qarajat jas bıznesmenge tıimdi nesıe rásimdep, óndirisin keńeıtýge ekpin berdi.
«Biz naǵyz bylǵarydan aıaqkıim tigip, ony satýmen aınalysamyz. Eń alǵash mundaı aıaqkıimdi Almatydan taýyp, satyp aldym. Sony tutynyp júrdim. Keıin nege óńirimizden osyndaı kásip ashpasqa dep oılandym da, táýekel ettim. Sheberler taptym. Sharýamyz jaman emes. Taza bylǵarydan tigemiz. «Damý» qorynyń kómegi kásibime jańa tynys ákeldi. Olardyń mundaı múmkindigin úsh jylda úsh márte ıgiligime jarattym. Qajetti jabdyqtar aldyq. Materıal qoryn baıyttyq», deıdi «Dorosh» kompanııasynyń basshysy Nıkıta Dorosh.
Kabel ótkizetin arnaıy qorap óndirýge mamandanyp alǵan «Profland-RT» JShS kompanııasy 2007 jyldan beri jumys isteıdi. Jyl saıyn 5 myń tonna ónimin naryqqa shyǵarady. 2022 jyly «Bıznestiń jol kartasy – 2025» baǵdarlamasy negizinde kásiporyn jabdyqtaryn satyp alý jáne óndiristik bazany jóndeýge 6 paıyzben, «Damý» qorynyń kepildigimen ekinshi deńgeıdegi bank arqyly 149 mln teńgege eki kredıttik transh alady. Eki jyldan keıin biryńǵaı keshendi baǵdarlamanyń arqasynda kompanııa bank arqyly aınalym qarajatyn tolyqtyrý maqsatynda qarjylandyryldy. Paıyzdyq mólsherleme 8 paıyzǵa deıin tómendetilip, «Damý» qorynan kepildik aldy.
«Kompanııamyzǵa 18 jyl toldy. Kún elektr stansalarynyń qurylysyna, kabeldik naýalarǵa, qosalqy qurylymdarǵa arnalǵan metall profıl óndirýmen aınalysamyz. О́nim assortımenti úlken. О́ndiriste shamamen 70 adam jumys isteıdi. Aınalym qarajatyn jáne ınvestısııalyq jobalarymyzdy nesıeleý úshin «Damýǵa» júginip, sonyń arqasynda ónim qýatyn arttyrdyq», deıdi «Profland-RT» JShS dırektory Artem Slesarenko.
Topardaǵy «AAA LLP» JShS jylyjaıy zamanaýı agrotehnıkalyq ádister men tehnologııalardy qoldana otyryp negizinen qııar men qyzanaq ósiredi. Bıyl Topar jylyjaıy bank arqyly aınalym qarajatyn jyldyq 10 paıyzben tolyqtyraıyn dep eki transh alady. Oǵan «Damý» qory 84 paıyz kóleminde kepildik beredi.
«Damý» qorynyń, basqa da memlekettik baǵdarlamalardyń qoldaýymen keńeıýdi josparlap otyrmyz. 16 kókónis túrin ósiremiz. Qııardan bastap askókke deıin. Búginde jylyjaıymyzda 300-ge jýyq adam jumys isteıdi. 6 000 tonnadan astam ónimdi naryqqa shyǵaramyz», deıdi «AAA LLP» JShS dırektory Abdýraýf Abdýmavlonov.
Qaraǵandy oblysy